ৰাইজৰ খবৰ ডিজিটেল, গুৱাহাটীঃ অসমৰ দবাপ্ৰেমী ৰাইজ তথা খেলুৱৈৰ বাবে এটা ভাল খবৰ যে সদৌ অসম দবা সন্থাৰ চাৰিগৰাকী বিষয়ববীয়াক সৰ্বভাৰতীয় দবা মহা সংঘৰ(AICF)-ৰ গুৰুত্বপূৰ্ণ সমিতিত নিযুক্ত কৰা হৈছে। এই নিযুক্তি ২০২৪ চনৰ ১২ ছেপ্টেম্বৰ তাৰিখে নতুন দিল্লীত অনুষ্ঠিত সৰ্বভাৰতীয় দবা মহাসংঘৰ বিশেষ সাধাৰণ সভাত গৃহীত হয়। সদৌ অসম দবা সন্থাৰ যুটীয়া সম্পাদক প্ৰণৱ কুমাৰ নাথে জনায় যে সদৌ অসম দবা সন্থাৰ সাধাৰণ সম্পাদক ৰাজীব ধৰক AICF-ৰ ইভেণ্টছ্ কমিটীৰ অধ্যক্ষ হিচাপে নিযুক্ত কৰা হৈছে। তদুপৰি, তেওঁ উত্তৰ-পূব আৰু আন্দামান-নিকোবৰ দ্বীপপুঞ্জত দবা উন্নয়নৰ বাবে গঠিত কমিটীৰ সদস্যৰূপে নিৰ্বাচিত হৈছে। গুৱাহাটী চিটি দবা সন্থাৰ সভাপতি মুকুতা ডেকাক AICF-ৰ ‘চেছ ইন স্কুলছ কমিছন’-ৰ উপাধ্যক্ষ হিচাপে নিযুক্ত কৰা হৈছে। সদৌ অসম দবা সন্থাৰ উপ-সভাপতি ড॰ চৰ্বাকক AICF-ৰ আৰ্বিটাৰছ কমিটী আৰু SOP খচৰা (SOP Draft) কমিটীত সদস্য হিচাপে নিযুক্ত কৰা হৈছে। আনহাতে, কামৰূপ জিলা দবা সন্থাৰ সম্পাদক অৰিন্দম বৰুৱাক AICF-ৰ টেণ্ডাৰ কমিটীত সদস্য হিচাপে নিযুক্ত কৰা হৈছে৷ এই নিযুক্তিসমূহে সৰ্বভাৰতীয় দবা মহাসংঘত অসমৰ গুৰুত্ব বাঢ়ি অহা সুস্পষ্ট চিন হিচাপে বিবেচিত হৈছে বুলি উল্লেখ কৰে সদৌ অসম দবা সন্থাৰ সভাপতি কন্দৰ্প কলিতাই৷ তেখেতে নিযুক্তিপ্ৰাপ্ত কেউজনকে অভিনন্দন জনোৱাৰ লগতে সৰ্ব ভাৰতীয় দবা ক্ষেত্ৰখনিত গুৰুত্বপূৰ্ণ অৱদান আগবঢ়াবলৈ আহ্বান জনাইছে৷
