জিতুল কুমাৰ গগৈ, যোৰহাটঃ যোৰহাট ষ্টেডিয়ামত জিলা ক্ৰীড়া সন্থাৰ সৌজন্যত চলি থকা ‘বি’ ডিভিজন ফুটবল লীগ প্ৰতিযোগিতাৰ আজি প্ৰথমখন ছেমি ফাইনেলত অনিৰুদ্ধদেৱ স্প’ৰ্টছ ক্লাবে উত্তৰ যোৰহাট উপ-ক্ৰীড়া সন্থাক ৪-০ গ’লৰ ব্যৱধানত পৰাজিত কৰি ফাইনেল খেলাৰ যোগ্যতা অৰ্জন কৰিছে। আৰম্ভনি পৰাই অনিৰুদ্ধদেৱ স্প’ৰ্টছ ক্লাবৰ খেলুৱৈ সকলে উত্তৰ যোৰহাট উপ-ক্ৰীড়া সন্থাক সম্পূৰ্ণৰূপে চাপত ৰাখি খেলৰ ২৯ মিনিটত অনিৰুদ্ধদেৱ দলৰ দিংকু দত্তই এটা গ’ল দি দলটোক প্ৰথমেই ১-০ গ’লৰ অগ্ৰগতি দিবলৈ সক্ষম হয়। পুনৰ ৩২ মিনিটত দিংকু দত্তই ব্যক্তিগত দ্বিতীয়টো গ’ল দি দলটোক প্ৰথমাৰ্ধতে ২-০ গ’লৰ অগ্ৰগতি দিয়ে। দ্বিতীয়াৰ্ধত অনিৰুদ্ধদেৱ দলৰ পিংকু মোহনে খেলৰ ৪৬ মিনিটত এটা গ’ল দিয়াত দলটোৱে ৩-০ গ’লৰ অগ্ৰগতি লাভ কৰাৰ উপৰিও খেলৰ ৬৮ মিনিটত দলটোৰ অংকুৰ দাসে এটা গ’লৰ দিয়াত ৪-০ গ’লৰ বৃহৎ ব্যৱধানত জয়ী হৈ দলটোৱে প্ৰতিযোগিতাখনৰ ফাইনেলত প্ৰৱেশ কৰে। আজিৰ খেলখন পৰিচালনা কৰে ত্ৰিনুজ বৰাই। আনহাতে শনিবাৰে অনুষ্ঠিত হ’বলগা প্ৰতিযোগিতাখনৰ দ্বিতীয়খন ছেমি ফাইনেল খেলত অসম ৰেঞ্জাৰ এফ চি আৰু যোৰহাট ক্লাবৰ মাজত হ’ব।
