নিউজ ডেস্ক ৰিপ’ৰ্ট, ৰাইজৰ খবৰ ডিজিটেলঃ ১৬ নৱেম্বৰ৷ ৰাষ্ট্ৰীয় প্ৰেছ দিৱস। মৰিগাঁও জিলা সাংবাদিক সংস্থাৰ সহযোগত জিলা প্ৰশাসনে অনুষ্ঠিত কৰা ৰাষ্ট্ৰীয় প্ৰেছ দিৱসৰ লগত সংগতি ৰাখি মৰিগাঁও জিলা প্ৰশাসনৰ তৰফৰ পৰা জ্যেষ্ঠ সাংবাদিক নজৰুল ইছলামক সম্বৰ্ধনা জনোৱা হয়৷
মায়ং অঞ্চলৰ বালিমুখ গাঁৱত জন্মগ্রহণ কৰি একাগ্রতা আৰু অধ্যবসায়ৰ জৰিয়তে সাংবাদিকতাৰ ক্ষেত্ৰখনত সুনাম অর্জন কৰিবলৈ সক্ষম হোৱা নজৰুল ইছলামে জাগীৰোড মহাবিদ্যালয়ৰ পৰা স্নাতক ডিগ্রী অর্জন কৰে৷ পৰৱৰ্তী সময়ত তিনিচুকীয়াৰ জাৰ্ণেলিজম একাডেমীৰ পৰা সাংবাদিকতাৰ পাঠ্যক্রম সম্পূর্ণ কৰি সংবাদ ক্ষেত্ৰখনৰ লগত জড়িত হৈ পৰে। ২০০১ চনৰ পৰা আমাৰ অসম’, ‘অগ্রদূত’ আৰু ‘আজি’ কাকতত ঝাৰগাঁৱৰ পৰা সংবাদ সেৱা আগবঢ়াই অহা সাংবাদিক নজৰুল ইছলামে বিভিন্ন দুর্গম এলেকাৰ উন্নয়নৰ ক্ষেত্ৰত দৃঢ় ভূমিকা গ্রহণ কৰি আহিছে। মায়ঙৰ প্রতিনিধি হিচাপে ২০০১ চনৰ পৰাই অসমৰ আগশাৰীৰ বাতৰিকাকত ‘অসমীয়া প্রতিদিন’ৰ সৈতে সক্রিয়ভাবে জড়িত হৈ পৰৱৰ্তী সময়ত ২০১২ চনৰ পৰা প্ৰতিদিন গোষ্ঠীৰে ইলেক্ট্রনিক মাধ্যম ‘প্রতিদিন টাইম’ৰ সাংবাদিক হিচাপেও সংবাদ সেৱা আগবঢ়াই আহিছে সাংবাদিক ইছলামে।
আনহাতে, তেখেতে মৰিগাঁৱৰ পৰা প্রকাশিত সাপ্তাহিক বাতৰিকাকত ‘সাপ্তাহিক মৰিগাঁও’, ‘সাপ্তাহিক বৰঅসম’ আদি কাকততো নিয়মীয়াকৈ সংবাদসেৱা আগবঢ়োৱাৰ লগতে সময়োপযোগী লিখা-মেলাও কৰি আহিছে। এগৰাকী সমাজ সংগঠক, ক্রীড়া আৰু সাংস্কৃতিক কর্মী, ঘোষক, আবৃত্তিকাৰ আৰু ফুটবল খেলৰ ধাৰাভাষ্যকাৰ হিচাপেও জনমানসত পৰিচিত সাংবাদিক নজৰুল ইছলামক নিষ্ঠা আৰু সততাৰে সাংবাদিকতাৰ ক্ষেত্ৰখনলৈ সেৱা আগবঢ়োৱাৰ বাবে মৰিগাঁও জিলাৰ আয়ুক্ত দেৱাশীষ শৰ্মা আৰু ভাৰপ্ৰাপ্ত জিলা জনসংযোগ বিষয়া ড° সংগীতা বৰঠাকুৰৰ লগতে মৰিগাঁও জিলা সাংবাদিক সংস্থাৰ সভাপতি বিৰিঞ্চি কুমাৰ শৰ্মা আৰু সম্পাদক জিতুমণি নাথ স্বাক্ষৰিত সম্বৰ্ধনা পত্ৰ প্ৰদান কৰা হয়৷
