৩১ ডিছেম্বৰ
— গীতাৰ্থী ঠাকুৰ
নিচলীয়া ভাৱৰ বুৰবুৰণিত
পকনিয়া হামোৰণিত
শব্দ নিমাত
ওলোৱাৰ নাই বাট।।
নি়ঃশব্দ-নদীত
চটফটায় সাগৰমুখী মাছ।
ঘূকুটিয়াই ঘূকুটিয়াই নিশাৰ তালফাল মৌনতা
স্মৃতিৰ জঁপাত শব্দৰ কাতৰতা।
পানী বিচনাত ওমলি আছে
গেঁৰ ধৰা এটি পুৰণি সাধু।
জীয়া শিলৰ গান শুনি
শুই পৰিল সাধু।
ৰ লাগি চাই আছে এটা বৰফৰ বেলি
আৰু শীতত শীৰ্ণ চল্লিশটা গধুলি।।
এক নতুনৰ আৰম্ভণি
— পঙ্কজ সভাপণ্ডিত
উত্তৰ লখিমপুৰ,
মবাইল নম্বৰ :৯৯৫৪৯৪৭৫৯৩
নৱ বৰ্ষ প্ৰথম পুৱা,
সকলো একেই আছে,
পুৱাৰ কোমল ৰ’দ,
পক্ষীৰ ক’লৰব,মাৰ মৰম আৰু জুহালখন,
হিম চেঁচা এজাক বতাহ,
কিন্তু সলনি হ’ল এটা বৰ্ষ,
এটা বছৰৰ ইতিহাসৰ বুকুত লিপিৱদ্ধ হ’ল, আন এক নতুন বৰ্ষৰ আৰম্ভনি হ’ল, নতুন বৰ্ষৰ সুদিনে কঢ়িয়াই আনক প্ৰত্যয় আৰু প্ৰাপ্তিৰ এক অনাবিল আনন্দ, শস্য শ্যামলা হওঁক ধৰিত্ৰী,
মানৱতাৰ জয়গানৰ এক ছন্দোময় যাত্ৰাৰ
আৰম্ভণি হওঁক…..
হাইকুৰ দৰে…
— অংকুৰিতা ফুকন
১
সমস্ত ঘৃণাৰ শেষত জন্ম হোৱা হোৱাৰ প্ৰেমেই আত্মপ্ৰেম…
২
নৈয়ে নাজানে সোঁত হৈ বৈ থকাবোৰ কেৱল পানী নে কাৰোবাৰ চকুলো…
৩
মৌনতাৰ কোলাহলত উজাগৰী নিশা কটোৱাজক সুধিবা
নিশাবোৰ কিমান জয়াল…
৪
মাটিলৈ ভয় কৰা মানুহে আকাশৰ ফালেও চাব নোৱাৰে…
৫
দুজনৰ মাজৰ দূৰত্বৰ মাজত
জন্ম লয় অন্য এখন পৃথিৱী…
