মুখ্যমন্ত্ৰীক কাতৰ অনুৰোধঃ আমাক অন্তত চলিব পৰাকৈ পাৰিশ্ৰমিক দিয়ক
ৰাইজৰ খবৰ ডিজিটেল, কাজিৰঙা, ১৬ জুনঃ “আমি কাজিৰঙাৰ বন্যপ্ৰাণীৰ বাবে স্থায়ী বনকৰ্মী, ফ’ৰেষ্ট বেটেলিয়নৰ সমানেই কাম কৰো৷ বন্যপ্ৰাণীৰ সুৰক্ষাত থাকি আমাৰ লগৰে বহু ঘূণীয়া হ’ল, বহুতে চকু মুদিলে৷ আমাক অন্তত চলিব পৰাকৈ পাৰিশ্ৰমিক দিয়ক৷”— এইদৰেই আজি সংবাদ মাধ্যমৰ যোগেদি ৰাজ্যৰ মুখ্যমন্ত্ৰীক কাতৰ অনুৰোধ জনালে কাজিৰঙা ৰাষ্ট্ৰীয় উদ্যানৰ অস্থায়ী বনকৰ্মীসকলে৷ উল্লেখ্য, কালি বনবিভাগ আৰু আৰক্ষীৰ স’তে এক পৰ্যালোচনা সভাত অংশ ল’বলৈ কাজিৰঙালৈ আহিছিল মুখ্যমন্ত্ৰী ড° হিমন্ত বিশ্ব শৰ্মা৷ কাজিৰঙা ৰাষ্ট্ৰীয় উদ্যান আৰু বন্যপ্ৰাণীৰ সুৰক্ষাৰ বাবে মুখ্যমন্ত্ৰীগৰাকীয়ে কেবাটাও প্ৰস্তাৱ ঘোষণা কৰাৰ বিপৰীতে কাজিৰঙাৰ অস্থায়ী বনকৰ্মীসকলৰ নিয়মীয়াকৰণৰ সন্দৰ্ভত উচ্চতম ন্যায়ালয়ৰ ৰায়দানৰ প্ৰসংগেৰে চৰকাৰৰ হাতত কোনো ব্যৱস্থা নাই বুলি মন্তব্য কৰে৷ ইয়াৰ পাছতে আজি তাৎপৰ্যপূৰ্ণভাৱে উদ্যানৰ কেউটা বনাঞ্চলৰ পৰা অস্থায়ী বনকৰ্মীসকলৰ অৰ্ধ শতাধিক প্ৰতিনিধিৰ দল কহঁৰাত উপস্থিত হয়৷ দলটোৱে কহঁৰাস্থ বনবিভাগৰ হেৰিটেজ আই বিত ৰাজ্যৰ বনমন্ত্ৰী চন্দ্ৰমোহন পাটোৱাৰীক সাক্ষাৎ কৰি অস্থায়ী বনকৰ্মীসকলৰ ওজৰ-আপত্তি অৱগত কৰাৰ লগতে তেওঁলোকৰ পাৰিশ্ৰমিক বৃদ্ধিৰ বাবে অনুৰোধ জনায়৷ অস্থায়ী বনকৰ্মী সকলে জানিব দিয়া ম’তে, কাজিৰঙা ৰাষ্ট্ৰীয় উদ্যানত কৰ্মৰত ২৫৩ গৰাকী অস্থায়ী বনকৰ্মীয়ে বিগত বছৰ বছৰ ধৰি বন্যপ্ৰাণীৰ বাবে সেৱা আগবঢ়াই আহিছে৷ তেনেক্ষেত্ৰত মুখ্যমন্ত্ৰীৰ মন্তব্যৰ পাছতে অতিশয় দুখিত আৰু শংকিত হোৱা বুলি প্ৰকাশ কৰি অস্থায়ী বনকৰ্মীসকলে কয় যে, ৰাজ্যৰ অন্যান্য প্ৰান্তত ফিক্স পে হ’ল, কিন্তু কাজিৰঙাত এজনো অস্থায়ী বনকৰ্মীৰ বৰ্তমানলৈকে হোৱা নাই৷ অথচ ১৯৯৩ চনৰ পৰা খাটি থকা অস্থায়ী বনকৰ্মীও কাজিৰঙাত আছে৷ অন্যান্যসকলে ২৫ হেজাৰ টকাকৈ পাৰিশ্ৰমিক পোৱাৰ বিপৰীতে কাজিৰঙাৰ এই অস্থায়ী বনকৰ্মীসকলে মাত্ৰ দহহেজাৰ টকাৰ বিনিময়তে খাটি থাকিব লগা হৈছে৷ গতিকে চাকৰি নিয়মীয়া নকৰিলেও মুখ্যমন্ত্ৰীগৰাকীক কাজিৰঙাৰ এই অস্থায়ী বনকৰ্মীসকলৰ বাবে ফিক্স পে’ বিষয়টিত হস্তক্ষেপ কৰি সমাধান কৰিবলৈ অনুৰোধ জনাই প্ৰতিনিধি দলটোৱে৷ দিনে-নিশাই নিজৰ জীৱনকো তুচ্ছ কৰি কৰ্তব্যত নিয়োজিত এইসকল বনকৰ্মীৰ মনোবল টুটি পৰা বুলি প্ৰকাশ কৰি কয়, অৱসৰ গ্ৰহণ কৰিবলৈ দুই-তিনি বছৰ থকা একাংশ অস্থায়ী বনকৰ্মীয়ে এই ফিক্স পে’টো পালে অন্তত তেওঁৰ পৰিয়ালটোৱে কিছু সকাহ পাব৷
