বানে ধোৱা কাজিৰঙাত
৬ টা গঁড় সহ ১১৪ টা বন্যপ্ৰাণীৰ মৃত্যু
নিউজ ডেস্ক ৰিপ’ৰ্ট, ৰাইজৰ খবৰ ডিজিটেলঃ জলমগ্ন কাজিৰঙাত সম্প্ৰতি বাঢ়নি পানীৰ জলস্তৰ কিছু পৰিমাণে হ্ৰাস হৈছে যদিও আলৈ-আথানি যেন হ্ৰাস পোৱা নাই বন্য জীৱকুলৰ৷ ক’ৰবাত যদি আহত-অসহায় বন্যপ্ৰাণী উদ্ধাৰ হৈছে, আন ক’ৰবাত উদ্ধাৰ হৈছে বানৰ স’তে যুঁজি হাৰ মনা বন্যপ্ৰাণীৰ শৱদেহ৷ চলিত বছৰৰ প্ৰথমটো বানৰ কৱলত পৰি জলমগ্ন হৈ পৰা কাজিৰঙাই বানৰ প্ৰকোপত এইপৰ্যন্ত হেৰুৱাইছে গঁড়সহ ১১৪ টা বন্যপ্ৰাণী৷
আজি সন্ধ্যা কাজিৰঙা ৰাষ্ট্ৰীয় উদ্যান তথা ব্যাঘ্ৰ সংৰক্ষিত বনাঞ্চল কৰ্তৃপক্ষৰ তৰফৰ পৰা প্ৰকাশ কৰা তথ্য অনুসৰি, কাজিৰঙাৰ বিভিন্ন এলেকাত বাঢ়নি পানীত বুৰি মৃত্যুমুখত পৰিছে ৬ টাকৈ গঁড়৷ একেদৰে পানীত ডুবি মৃত্যু হৈছে ৯৪ টা পহুৰ৷ আনহাতে, উদ্ধাৰ কৰা পহুসমূহৰ ভিতৰত ১১ টাকৈ পহুৱে যত্ন লৈ থকাৰ অৱস্থাতে মৃত্যুক সাৱটিছে৷ উল্লেখ্য, কাজিৰঙা ৰাষ্ট্ৰীয় উদ্যান প্লাৱিত হোৱাৰ লগে-লগে বন্যপ্ৰাণীসমূহে ওখ আশ্ৰয়ৰ সন্ধানত উদ্যানৰ দক্ষিণৰ কাৰ্বি পাহাৰ আৰু ইয়াৰ নামনি অঞ্চলত আশ্ৰয় লোৱাৰ সমান্তৰালকৈ একাংশ বন্যপ্ৰাণীয়ে আশ্ৰয় লয় উদ্যানৰ অন্তৰ্ভাগৰ হাইলেণ্ড সমূহত৷ তাৰ মাজতেই বানৰ প্ৰকোপৰ বাবে সুৰক্ষিত আশ্ৰয়ৰ সন্ধানত ভ্ৰমি ফুৰোঁতেই বানৰ মাজত অসহায়-অলস হৈ মৃত্যুক সাৱটিব লগা হয় একাংশ বন্যপ্ৰাণীয়ে৷ চলিত বানত বন্যপ্ৰাণীক সুৰক্ষা দিবলৈ বিভাগীয় কৰ্তৃপক্ষৰ লগতে ভিন্ন ব্যক্তি-সংস্থায়ো বন্যজন্তুলৈ আগবঢ়াইছে সহায়ৰ হাত৷ কিন্তু তাৰ মাজতে ১১৪ টাকৈ বন্যপ্ৰাণীৰ মৃত্যুৰ খবৰে স্বাভাৱিকতেই বেথা দিব প্ৰকৃতিপ্ৰেমীসকলক৷ ইফালে, তথ্য অনুসৰি বৰ্তমানলৈকে ৪৭ টা পহু (hog deer), ২ টা শৰ পহু (sambar) আৰু এটা ইণ্ডিয়ান হেয়াৰ (indian hare) সহ মুঠ ৫০ টা বন্যপ্ৰাণী দু্ৰ্যোগপূৰ্ণ অৱস্থাৰ পৰা উদ্ধাৰ কৰি চিকিৎসা প্ৰদানৰ অন্তত সফলতাৰে মুকলি কৰা হৈছে৷ আনহাতে, ২৮ টা পহু, ১ টা গঁড় পোৱালি, ১ টা হাতী, ১ টা বনৰীয়া মেকুৰি (jungle cat), ১ টা উদ (otter) আৰু দুটা ফেঁচা (scops owl) সহ মুঠ ৩৪ টা বন্যপ্ৰাণী চিকিৎসাধীন অৱস্থাত আছে৷
প্ৰকাশ কৰা তথ্য অনুসৰি, ৮৬ টা পহু (hog deer), ১ টা গঁড় পোৱালি, ১ টা হাতী, দুটা শৰ পহু (sambar), ১ টা ইণ্ডিয়ান হেয়াৰ (indian hare), ১ টা উদ (otter), দুটা ফেঁচা (scops owl), ১ টা বনৰীয়া মেকুৰি (jungle cat) সহ মুঠ ৯৫ টা বন্যপ্ৰাণী উদ্ধাৰ কৰা হৈছে৷ শেহতীয়া খবৰ অনুসৰি, কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ মুঠ ২৩৩ টা বনশিৱিৰ এলেকাৰ ৬৬ টা বনশিৱিৰ এলেকা বৰ্তমানেও পানীৰ তলত৷ সেইম’তে, অগৰাতলিত ৯ টা, কহঁৰাত ২৪ টা, বাগৰিত ১৯ টা, বুঢ়াপাহাৰত ৫ টা, বোকাখাতত ২ টা, বিশ্বনাথত ১ টা আৰু নগাঁও বন্যপ্ৰাণী সংমণ্ডলত ৪ টা বনশিৱিৰ এলেকা পানীত বুৰ গৈ আছে৷
