ডা° দীননাথ শৰ্মাক জানেনে ?
অসমীয়া সমাজ আৰু সাহিত্য জগতলৈ বিশেষ বৰঙনি আগবঢ়াই অসমত আধুনিক চিন্তা-চৰ্চাৰ প্ৰসাৰ ঘটাই এটা যুগৰ সূচনা কৰা “আৱাহন’’ আলোচনীৰ (১৯২৯ চনত প্ৰথম প্ৰকাশ) প্ৰতিষ্ঠাপক সম্পাদক ডা° দীননাথ শৰ্মাৰ আজি স্মৃতিদিৱস।
চিকিৎসক ৰূপে কৰ্মজীৱনৰ আৰম্ভণি কৰা ডা° শৰ্মাই প্ৰকৃতাৰ্থত অসমীয়া ভাষা-সাহিত্যৰ নিৰৱচ্ছিন্ন সাধক ৰূপে সেৱা আগবঢ়াইছিল। তেখেতে ‘আৱাহন’ৰ সম্পাদকীয় নিৱেদনত লিখিছিল যে জাতীয় উত্থান বা দেশৰ উন্নতিৰ মূলতেই হৈছে সাহিত্য ৷ “ছোভিয়েট বিপ্লৱ আৰু অসমীয়া সাহিত্য’’ পুথি ৰচনা কৰি তেওঁ লাভ কৰিছিল ছোভিয়েট দেশ নেহৰু বঁটা। তেওঁ ৰচনা কৰা আন এখন গ্ৰন্থ হৈছে “ভাৰত ৰুছ কাহিনী’’।
তেওঁৰ কলমত সদায় দেশ আৰু জাতিৰ দায়বদ্ধতা প্ৰকাশ পাইছিল। মহাত্মা গান্ধীৰ অস্পৃশ্যতাবিৰোধী আন্দোলনক গুৰুত্ব প্ৰদান কৰাৰ লগতে তেওঁ গান্ধীৰ আদৰ্শেৰে অনুপ্ৰাণিত হৈ ভাৰতৰ স্বাধীনতা আন্দোলনত যোগদান কৰিছিল আৰু সমাজৰ অন্ধবিশ্বাস, কুসংস্কাৰ দূৰ কৰাৰ বাবে অসমৰ গাঁৱে-নগৰে ঘূৰি মানুহৰ মাজত সজাগতা সৃষ্টিৰ প্ৰয়াস কৰিছিল।
এই গৰাকী মহান অসমীয়াৰ ১৯৭৮ চনৰ ৪ জুনত পৰলোকপ্ৰাপ্তি ঘটে।
সংগ্ৰহ আৰু সম্পাদনাঃ গীতিৰেখা দত্ত
