নগাঁও লোক সভা সমষ্টিৰ সাংসদ প্ৰদ্যুত বৰদলৈক জাগীৰোড সমষ্টিৰ ৰাইজৰ উষ্ম আদৰণি
নিউজ ডেস্ক ৰিপ’ৰ্ট, ৰাইজৰ খবৰ ডিজিটেলঃ নগাঁও লোকসভা সমষ্টিৰ কংগ্ৰেছ দলৰ সাংসদ প্ৰদ্যুত বৰদলৈয়ে মৰিগাঁও জিলাৰ জাগীৰোড বিধান সভা সমষ্টিত সাংসদ নিৰ্বাচিত হোৱাৰ পিছত আজি প্ৰথমবাৰৰ বাবে উপস্থিত হয়। সাংসদ গৰাকীৰ আগমনত সমষ্টিটোৰ বিভিন্ন এলেকাৰ উৎফুল্লিত ৰাইজে ঢোলে দগৰে উষ্ম আদৰনি জনায় বৰদলৈক। পশ্চিম মায়ঙত সাংসদ প্ৰদ্যুত বৰদলৈক বিপুল সংখ্যক সমৰ্থকৰ দ্বাৰা উষ্ম আদৰণি জনোৱাৰ পিছত মায়ঙৰ লক্ষী মন্দিৰত যথেষ্ট সংখ্যক ৰাইজে ফুলৰ থোপা, গামোছা, জাপিৰে সম্ভাষণ জনায়। ইয়াৰ পিছতেই কুৰানীবৰী, বুৰাবুৰীত মাৰ্কাজ একাডেমী, ইকৰা একচেলেঞ্চ একাডেমীৰ শিক্ষক আৰু ছাত্ৰ ছাত্ৰী, দৈপৰা, বিলিমৰা, বৰমপুৰ, মনহা, কোঁৱৰ গাঁও, ভকতগাঁও আদি অঞ্চলৰ ৰাইজে আদৰণি জনায় সাংসদগৰাকীক। প্ৰদ্যুত বৰদলৈক আজি সংগ দিয়ে কংগ্ৰেছ দলৰ কেইবাজনো দলীয় নেতা কৰ্মীয়ে। বৰদলৈয়ে প্ৰতিটো অঞ্চলৰ ৰাইজক কৃতজ্ঞতা জনাই কয় যে আগন্তুক দিনত নগাঁও লোক সভা সমষ্টিৰ প্ৰতিটো বিধান সভা সমষ্টিৰ ভোটাৰ ৰাইজক দেখা কৰাৰ আৰু সাধ্যানুসৰি সাংসদ পুঁজিৰ ধনেৰে উন্নয়ণ মূলক কাম কৰি যোৱাৰ আশ্বাস প্ৰদান কৰে। নগাঁও লোক সভা সমষ্টিৰ উল্লেখযোগ্য কিছুমান আঁচনি বিৰোধীত থাকি হলেও কেন্দ্ৰীয় চৰকাৰৰ সতে যোগাযোগ কৰি সমাধানৰ বাবে যাৱতীয় পদক্ষেপ হাতত ল’ব বুলিও কয় সাংসদগৰাকীয়ে। প্ৰদ্যুত বৰদলৈ দ্বিতীয়বাৰৰ বাবে নগাঁও লোকসভা সমষ্টিৰ পৰা জয়যুক্ত হোৱাত বিজেপিৰ দখলত থকা জাগীৰোড সমষ্টি দুৰ্বল হৈ পৰা লক্ষ্য কৰি কংগ্ৰেছ দলৰ নেতা কৰ্মী সকলে কিছু সকাহৰ অম্লজান পোৱা যেন অনুভৱ কৰিছে বুলি জানিবলৈ দিয়ে।
