বুবুল দত্ত , ৰাইজৰ খবৰ ডিজিটেলঃ কমাৰগাঁও মহাবিদ্যালয়ৰ পৰ্যটন বিভাগৰ উদ্যোগত আৰু আভ্যন্তৰীণ গুণগত মান নিশ্চিত কোষ (আই কিউ এ চি)ৰ সহযোগত বহনক্ষম পৰ্যটন, বনজ সম্পদ সংৰক্ষণ আৰু পৰ্যটন সম্বন্ধীয় এখনি কৰ্মশালা আজি অনুষ্ঠিত হয়৷ আই কিউ এ চিৰ সমন্বয়ক অঞ্জন শইকীয়া আৰু পৰ্যটন বিভাগৰ তত্ত্বাৱধায়ক দৰ্শনা মেধিয়ে আঁত ধৰা কৰ্মশালাখনি মুকলি কৰে মহাবিদ্যালয়খনিৰ অধ্যক্ষ ড° গৌতম কুমাৰ শইকীয়াই৷ মহাবিদ্যালয়খনিৰ ইংৰাজী বিভাগৰ মুৰব্বী অধ্যাপক ড° গায়ত্ৰী বৰা কাকতি উপস্থিত থকা কৰ্মশালাখনি মুকলি কৰি অধ্যক্ষ ড° শইকীয়াই এই কৰ্মশালাই যে শিক্ষাৰ্থীসকলক নতুন চিন্তাৰ বাট মোকলাই দিব সেই সম্বন্ধে উল্লেখ কৰে৷ ইপিনে, কৰ্মশালাখনিৰ প্ৰথম সত্ৰত সমল ব্যক্তি হিচাপে জ্যেষ্ঠ সাংবাদিক ধ্ৰুৱজ্যোতি সাহা উপস্থিত থকাৰ বিপৰীতে দ্বিতীয় সত্ৰত আন্তঃৰাষ্ট্ৰীয় পুৰস্কাৰপ্ৰাপ্ত প্ৰকৃতি সংৰক্ষণত ব্যস্ত থকা মনোজ গগৈ আৰু জ্যেষ্ঠ সাংবাদিক তথা পৰ্যটন কৰ্মী অভিজিৎ গগৈয়ে বক্তব্য আগবঢ়ায়৷ প্ৰথম সত্ৰত সাংবাদিক ধ্ৰুৱজ্যোতি সাহাই কয় যে কাজিৰঙাৰ পৰা জানিবলগীয়া, শিকিবলগীয়া বহু আছে৷ কাজিৰঙা কেৱল এখন পৰ্যটন ক্ষেত্ৰ নহয়, কাজিৰঙা এখন আন্তঃৰাষ্ট্ৰীয় পৰ্যায়ৰ বিশ্ববিদ্যালয়৷ তেখেতে কয়, এসময়ত জনশ্ৰুতিতে থকা কাজিৰঙাই এদিনতে বিশ্ব ঐতিহ্যক্ষেত্ৰৰ মৰ্যাদা পোৱা নাই৷ ইয়াৰ আঁৰত চৰকাৰী-বেচৰকাৰী সকলো পক্ষৰ যথেষ্ট সহযোগিতা আছে৷ আনহাতে, আজি কাজিৰঙাই বিশ্বৰ মানচিত্ৰত স্থান লাভ কৰিবৰ সক্ষম হোৱাৰ আঁৰত সামাজিক, ৰাজনৈতিক বিভিন্ন কাৰণ থাকিলেও মূল বিষয়টোৱেই জনগণৰ অৰ্থনৈতিক স্বাৱলম্বিতা৷ কাৰণ, দাঁতি কাষৰীয়া জনগণৰ অৰ্থনৈতিক সুৰক্ষাইহে কাজিৰঙাক সুৰক্ষিত কৰিছে অথবা কৰি ৰাখিব৷ কাজিৰঙা নিৱাসী জ্যেষ্ঠ সাংবাদিক তথা কাজিৰঙা অধ্যয়ন চক্ৰৰ অধ্যক্ষ ধ্ৰুৱজ্যোতি সাহাই কয় যে এটা সময়ত ১০/১২ টা গঁড় থকা কাজিৰঙাত সম্প্ৰতি ২৬১৩টা গঁড় আছে৷ বিশ্বৰ ৮০% গঁড়ৰ অৱস্থিতি থকা কাজিৰঙাৰ গঁড় সুৰক্ষাৰ ক্ষেত্ৰত চৰকাৰী পক্ষই যি ধৰণে দায়িত্ব পালন কৰিছে, ঠিক একেদৰেই কোনো ধৰণৰ পাৰিতোষিক অবিহনে কাষৰীয়া জনগণে সুৰক্ষা প্ৰদানত দিন-ৰাতি একাকাৰ কৰিছে৷ অঞ্চলটোৰ বাসিন্দাই নিজৰ খেতি মাটিডৰা বন্যজন্তুৰ স’তে আধিয়া কৰে৷ কাজিৰঙাৰ বন্যপ্ৰাণীৰ বাবেই বহুজনে নিজৰ পোহনীয়া পশুধন উচৰ্গা কৰাৰ সমান্তৰালভাৱে বহুজনে প্ৰাণ পৰ্যন্ত দিবলগীয়া হৈছে বুলিও সাংবাদিক সাহাই উল্লেখ কৰে৷ তেখেতে মহাবিদ্যালয়ৰ ছাত্ৰ-ছাত্ৰীসকলৰ স’তে জনশ্ৰুতিৰ পৰা বিশ্ব ঐতিহ্যক্ষেত্ৰলৈ কাজিৰঙাৰ যাত্ৰা, কাজিৰঙাৰ ইতিহাস, কাজিৰঙা ৰাষ্ট্ৰীয় উদ্যান, পৰ্যটন আৰু ইয়াৰ ভৱিষ্যত সম্বন্ধে বক্তব্য আগবঢ়ায়৷ বৃহত্তৰ কাজিৰঙা সাংবাদিক ধ্ৰুৱজ্যোতি সাহাই কয় যে ১৯০৫ চনত প্ৰস্তাৱিত সংৰক্ষিত এলেকাৰ অন্তৰ্ভুক্ত কৰা কাজিৰঙাক ১৯০৮ চনত সংৰক্ষিত এলেকা হিচাপে ঘোষণা কৰা হয়৷ পৰৱৰ্তী সময়ত ১৯১৬ চনত প্ৰমোদ উদ্যান, ১৯৫০ চনত অভয়াৰণ্য, ১৯৭৪ চনত ৰাষ্ট্ৰীয় উদ্যান আৰু ১৯৮৫ চনত বিশ্ব ঐতিহ্যক্ষেত্ৰৰ মৰ্যাদা লাভ কৰে কাজিৰঙা হাবিয়ে৷ আনহাতে, ২০০৬ বৰ্ষত ব্যাঘ্ৰ প্ৰকল্পৰ অন্তৰ্ভুক্ত কৰা হয় বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যানক৷ ইয়াৰ মাজতে ১৯৩৮ চনৰ পৰা কাজিৰঙাত পৰ্যটন আৰম্ভ হয়৷ কাজিৰঙা পৰ্যটনৰ বিভিন্ন দিশ উল্লেখ কৰাৰ লগতে কাজিৰঙা ৰাষ্ট্ৰীয় উদ্যান আৰু কাষৰীয়া এলেকা কেনেকৈ সুৰক্ষিত কৰি ৰাখিব পৰা যাব সেই সম্বন্ধেও বক্তব্য আগবঢ়ায় সাংবাদিক সাহাই৷ পৰ্যটনৰ সম্ভাৱনীয়তা, আন্তঃগাঁথনি উন্নয়ন তথা দেশী-বিদেশী পৰ্যটকৰ সন্মুখত উপস্থাপন শৈলী সম্বন্ধেও সাংবাদিক সাহাই আলোকপাত কৰে৷ আনহাতে, কৰ্মশালাৰ দ্বিতীয় সত্ৰত আন্তঃৰাষ্ট্ৰীয় পুৰস্কাৰপ্ৰাপ্ত প্ৰকৃতি সংৰক্ষণত ব্যস্ত থকা মনোজ গগৈ আৰু জ্যেষ্ঠ সাংবাদিক তথা পৰ্যটন কৰ্মী অভিজিৎ গগৈয়ে বক্তব্য আগবঢ়ায়৷ তেখেতসকলে নিজ নিজ বিভিন্ন অভিজ্ঞতা সম্বন্ধে ব্যক্ত কৰাৰ সমান্তৰালভাৱে পৰ্যটন মানচিত্ৰত স্থান লাভ কৰা কাজিৰঙা পৰ্যটনৰ বহনক্ষম অৱস্থা অক্ষুণ্ণ ৰাখিবলৈ কৰণীয় কি কি আছে সেই সম্বন্ধে উল্লেখ কৰে৷ তদুপৰি, কাজিৰঙা বিয়ণ্ড নেচনেল পাৰ্ক সম্বন্ধীয় এই ব্যতিক্ৰমী ধাৰণা সম্বন্ধে শিক্ষাৰ্থী সকলৰ স’তে আলোচনা কৰে৷
