‘সামাজিক মাধ্যমক ভালদৰে ব্যৱহাৰ কৰি গণবিক্ষোভ হ’ব পাৰে তাৰ প্ৰমাণ অসম বা ভাৰততে নহয়, পৃথিৱীৰ ইতিহাসে আমাক ইতিমধ্যে পতিয়নযুক্তভাৱে দি থৈছে’- পাঁচ দিনীয়া বোকাখাত গ্ৰন্থমেলা ২০২৫ ত ময়ূৰ বৰা
নিউজ ডেস্ক, ৰাইজৰ খবৰ ডিজিটেলঃ
‘সামাজিক মাধ্যমৰ কথাবোৰ কেৱল বিক্ষিপ্ত ঘটনা নহয়। সামাজিক মাধ্যমক ভালদৰে ব্যৱহাৰ কৰি গণবিক্ষোভ হ’ব পাৰে তাৰ প্ৰমাণ অসম বা ভাৰততে নহয়, পৃথিৱীৰ ইতিহাসে আমাক ইতিমধ্যে পতিয়নযুক্তভাৱে দি থৈছে’। এনেদৰে ২৪ মাৰ্চত বোকাখাত গ্ৰন্থমেলা ২০২৫ ৰ তৃতীয় দিনাৰ কাৰ্যসূচীত বিশিষ্ট চিন্তাবিদ ময়ূৰ বৰাই কয়। সামাজিক মাধ্যমৰ উচিত ব্যৱহাৰ সন্দৰ্ভত মন্তব্য কৰি বৰাই আৰু কয়, ‘কোনো নেটা নোহোৱাকৈ গুৱাহাটীৰ দৰে কংক্ৰিটৰ এক অভয়াৰণ্যত দীঘলী পুখুৰীৰ পাৰৰ গছকেইজোপা আমাৰ গণসমাজে আজিলৈকে বচাই ৰাখিব পাৰিছে। এয়া সামাজিক মাধ্যমৰ বাবে সম্ভৱ হৈছে’। বৰাই লগতে সামাজিক মাধ্যমৰ কু-ব্যৱহাৰেৰে সমাজৰ একাংশ মানুহৰ হোৱা নৈতিক স্খলনৰ প্ৰতি তীব্ৰ প্ৰতিক্ৰিয়া প্ৰকাশ কৰি ধিক্কাৰ দিয়ে।
প্ৰয়াস অধ্যয়ন চক্ৰৰ উদ্যোগত আৰু বোকাখাতৰ সচেতন নাগৰিকৰ সহযোগত অনুষ্ঠিত বোকাখাত গ্ৰন্থমেলা ২০২৫ ৰ তৃতীয় দিনাৰ অন্যতম কাৰ্যসূচী বোকাখাতৰ সমূহ সংবাদকৰ্মীৰ সহযোগত জ্যেষ্ঠ সাংবাদিকদ্বয় ভৱানন্দ কলিতা আৰু স্বপন নাথৰ আহ্বানত আপকুৰ প্ৰতিষ্ঠাপক সভাপতি ভৱেশ শইকীয়া সোঁৱৰণী ‘গণতন্ত্ৰৰ সুৰক্ষাৰ ক্ষেত্ৰত সংবাদ মাধ্যম আৰু সামাজিক মাধ্যমৰ অৱস্থিতি’ শীৰ্ষক আলোচনা অনুষ্ঠিত হয়। উক্ত অনুষ্ঠানত অংশগ্ৰহণ কৰে বিশিষ্ট চিন্তাবিদ ময়ূৰ বৰা আৰু বিশিষ্ট সাংবাদিক সন্দিপন তালুকদাৰে। আলোচনাত অংশ লৈ তালুকদাৰে বিষয় সন্দৰ্ভত বিতং বিশ্লেষণ আগবঢ়ায়। লগতে দুয়োগৰাকী আলোচকে উপস্থিত দৰ্শক ৰাইজৰ সৈতে মত বিনিময় কৰে। উল্লেখ্য যে তৃতীয় দিনাও দেখা গ’ল গ্ৰন্থপ্ৰেমী ৰাইজৰ ভিৰ তথা বিপুল সঁহাৰি।
গ্ৰন্থমেলাখনৰ অন্যতম ব্যতিক্ৰম দিশ হ’ল প্ৰতি পুৱা গ্ৰন্থমেলা বাকৰিৰ পৰিস্কাৰ পৰিচ্ছনতা অটুট ৰখাৰ বাবে ছাত্ৰ সমাজৰ সহযোগিতা। দ্বিতীয় দিনাৰ দৰে আজি তৃতীয় দিনাৰ পুৱাও বোকাখাতৰ চন্দ্ৰনাথ বেজবৰুৱা বিজ্ঞান মহাবিদ্যালয়ৰ উদ্যোগত মহাবিদ্যালয়ৰ ছাত্ৰ-ছাত্ৰীৰ সহযোগিতাত গ্ৰন্থমেলা বাকৰিৰ চাফাই কাৰ্য সম্পন্ন হয়। পুৱাৰ কাৰ্যসূচীৰ আৰম্ভণিতে ছাত্ৰ ছাত্ৰীৰ মাজত কুইজ প্ৰতিযোগিতা অনুষ্ঠিত হয়। চতুৰ্থ শ্ৰেণীৰ পৰা সপ্তম শ্ৰেণীলৈ ক শাখা, অষ্টমৰ পৰা দ্বাদশ শ্ৰেণীলৈ খ শাখাত এই কুইজ প্ৰতিযোগিতা অনুষ্ঠিত হয়। লগতে অনুষ্ঠিত বিশিষ্ট বিজ্ঞানী ড° পদ্মেশ্বৰ গগৈ সোঁৱৰণী ‘প্ৰকৃতি, পৰিৱেশ আৰু গ্ৰাম্য পৰ্যটন’ শীৰ্ষক আলোচনাত আলোচক হিচাবে অংশগ্ৰহণ কৰে উত্তম শইকীয়া, অভিজিত গগৈয়ে।
নৱ প্ৰজন্মৰ চিন্তাবিদ ৰক্তিম ঠাকুৰীয়াই উদ্বোধন কৰে। বিয়লিৰ ‘গণতন্ত্ৰৰ সুৰক্ষাৰ ক্ষেত্ৰত সংবাদ মাধ্যম আৰু সামাজিক মাধ্যমৰ অৱস্থিতি’ অনুষ্ঠানৰ আদৰণি ভাষণ প্ৰদান কৰে অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱাই। গ্ৰন্থমেলাৰ অন্যতম কাৰ্যসূচী গোলোক চন্দ্ৰ বৰা সোঁৱৰণী গায়ত্ৰী দলেৰ ৰচনা আৰু মলয়া বৰুৱাৰ পৰিচালনাত ‘মৰা মানুহৰ দেশ’ চোতাল নাট পৰিৱেশন হয়। সন্ধিয়ালৈ কলাই ওজা তামুলী সোঁৱৰণী ‘লোকসংগীত আৰু গণসংগীতৰ অনুষ্ঠান’ অনুষ্ঠিত হয়। একে অনুষ্ঠানতে বিশিষ্ট কবি-নাট্যকাৰ-সাংবাদিক অমৰ শৰ্মা সম্পাদিত বোকাখাতৰ কবি সকলৰ কাব্য সংকলন ‘ধনশিৰি চিত্ৰকল্প’ উন্মোচন কৰে বিশিষ্ট কবি দিলীপ ফুকনে।
নাট্যসন্ধ্যাত কুলদা কুমাৰ ভট্টাচাৰ্য সোঁৱৰণী পবিত্ৰ ৰাজখোৱাৰ ৰচনা, পৰিচালনাত ‘বন্ধ্যা’ মঞ্চস্থ হয়।
