ৰাইজৰ খবৰ ডিজিটেল, বোকাখাতঃ অসম ৰাজ্যিক সাংবাদিক সন্থা আৰু বৰাক ভেলী মিডিয়া ফ’ৰাম-এ যৌথভাৱে যোৱা ৩০ মাৰ্চত বিশিষ্ট সাংবাদিক আৰু লেখক তমোজ্যোতি ভট্টাচাৰ্যলৈ ‘বৰাক উপত্যকা সাংবাদিকতা বঁটা ২০২৫’ প্ৰদান কৰে৷
এই বঁটা প্ৰদান অনুষ্ঠান শিলচৰৰ গান্ধী ভৱনত অনুষ্ঠিত হয়৷ অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱাই অনুষ্ঠানত সভাপতিত্ব কৰে আৰু তথ্য আৰু জনসংযোগ বিষয়া বাহ্নিখা চেতিয়াই অনুষ্ঠান উদ্বোধন কৰে৷ অসম ৰাজ্যিক সাংবাদিক সন্থাৰ সম্পাদক প্ৰদীপ ডেকাই অনুষ্ঠানৰ উদ্দেশ্য ব্যাখ্যা কৰে, আৰু বৰাক ভেলী মিডিয়া ফ’ৰামৰ সম্পাদক চানি ৰয়ে আদৰণি ভাষণ প্ৰদান কৰে৷ অনুষ্ঠানত অসম ৰাজ্যিক সাংবাদিক সন্থাৰ কাৰ্যকৰী সভাপতি মনোজ কুমাৰ বৰঠাকুৰ, জেষ্ঠ সাংবাদিক মহুয়া চৌধুৰী, বঁটা প্ৰাপক চয়ন ভট্টাচাৰ্য, সুধন্য সিনহা আৰু বৰাক উপত্যকাৰ গৰিষ্ঠ সংখ্যক সাংবাদিক উপস্থিত থাকে৷ সাংস্কৃতিক সংগঠন ‘মনুষ্যত্ব’ আৰু ‘তপস্যা’ৰ দ্বাৰা প্ৰদৰ্শিত গীত আৰু নৃত্য অনুষ্ঠানে অনুষ্ঠানটিক অনন্য মাত্ৰা প্ৰদান কৰে৷
‘বৰাক উপত্যকা সাংবাদিকতা বঁটা ২০২৫’ গ্ৰহণ কৰি তমোজ্যোতি ভট্টাচাৰ্যই দুই উপত্যকাৰ সাংবাদিকক একেলগে একেখনি মঞ্চত একত্ৰিত হোৱাৰ বাবে দুয়োটি সংগঠনলৈ কৃতজ্ঞতা জ্ঞাপন কৰে৷ তেওঁ নিজৰ জীৱনৰ সাংবাদিকতাৰ আৰম্ভণিৰ সময়ৰ বিভিন্ন অভিজ্ঞতাৰ লগতে ভিন্ন সময়ৰ জটিল পৰিস্থিতি আৰু বৃহৎ পৰিৱৰ্তনবোৰ উল্লেখ কৰে৷ বৰাক উপত্যকাৰ জেষ্ঠ সাংবাদিক মহুয়া চৌধুৰী ওৰফে শিলা মহন্তিয়ে কয় যে তেওঁ বহু বছৰ ধৰি সাংবাদিকতাৰ সৈতে জড়িত আৰু এসময়ত সাংবাদিকতা এক কৃতিত্বহীন বৃত্তি আছিল৷ কিন্তু দীৰ্ঘদিন কাম কৰি অহাৰ পাছত পৰিস্থিতিৰ পৰিৱৰ্তন ঘটিছে৷ এক প্ৰস্তাৱ যোগে অসম ৰাজ্যিক সাংবাদিক সন্থাই ৰাজ্যত সাংবাদিকসকৰ ওপৰত চলি থকা আৰক্ষীৰ নিৰ্যাতনৰ প্ৰতিবাদ জনায়৷ সন্থাৰ তৰফৰ পৰা ৰাজ্য চৰকাৰক অনুৰোধ জনায় যাতে কোনো সাংবাদিকক গ্ৰেপ্তাৰৰ পূৰ্বে স্পষ্টভাৱে আইনসমূহ সংবাদ মাধ্যমক জনোৱা হয়৷ লগতে সাংবাদিকতাত পেঞ্চন লাভ কৰা সাংবাদিকৰ সংখ্যা বছৰি ২০ৰ পৰা ৪০লৈ বৃদ্ধি কৰিবলৈও দাবী জনায়৷ অসম ৰাজ্যিক সাংবাদিক সন্থাৰ পৰা বিশেষ সাংবাদিকতাৰ বঁটা গ্ৰহণ কৰি বিশিষ্ট সাংবাদিক চয়ন ভট্টাচাৰ্যই কয় যে ছপা মাধ্যমে এতিয়া ডিজিটেল মাধ্যমৰ পৰা, বিশেষকৈ সামাজিক মাধ্যমৰ তীব্ৰ প্ৰত্যাহ্বানৰ সন্মুখীন হৈছে৷ সেয়ে এইক্ষেত্ৰত পঢ়ুৱৈ, জনসাধাৰণ সকলোৱে সতৰ্ক আৰু সজাগ হোৱা উচিত৷
