ভৱেশ কলিতা , আজাৰাঃ গুৱাহাটীত ৩ এপ্ৰিলত উপস্থিত হ’ল ক্ৰিকেটৰ প্ৰভু মাষ্টাৰ ব্লাষ্টাৰ শচীন টেণ্ডুলকাৰৰ সৈতে পত্নী অঞ্জলি টেণ্ডুলকাৰ আৰু জীয়েক ছাৰা টেণ্ডুলকাৰ সহ তেওঁলোকৰ পৰিয়াল । কালি দুপৰীয়া মুম্বাইৰ পৰা আহি গুৱাহাটীৰ বৰঝাৰস্থিত লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমানবন্দৰত উপস্থিত হয় শচীন টেণ্ডুলকাৰ । বিমানবন্দৰত উপস্থিত হোৱাৰ লগে লগে অনুৰাগীসকলে উষ্ম আদৰণি জনায় ।
প্ৰায় সাতদিনীয়া ভ্ৰমণসূচী হাতত লৈ গুৱাহাটীত উপস্থিত হোৱা বুলি সংবাদ মাধ্যমৰ আগত সদৰি কৰে শচীন টেণ্ডুলকাৰে । লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমানবন্দৰৰ পৰা পোনে পোনে শ্বিলঙলৈ ৰাওনা হয় শচীন টেণ্ডুলকাৰ সহ তেওঁলোকৰ পৰিয়াল । সংবাদ মাধ্যমৰ আগত সদৰি কৰা মতে বৰাপানীত দুই নিশা কটাই অহা ৭ আৰু ৮ এপ্ৰিলত কাজিৰঙা ভ্ৰমণ কৰিব । কাজিৰঙাত জীপ আৰু হাতী চাফাৰী কৰিব বুলিও সদৰি কৰে শচীন টেণ্ডুলকাৰে । ইপিনে অহা ৯ এপ্ৰিলত গুৱাহাটীলৈ উভতি গৈ কামাখ্যা দৰ্শন কৰাৰ লগতে পূজা অৰ্চনা কৰাৰ সম্ভাৱনা থকা বুলি জানিবলৈ দিয়ে । ইয়াৰ পিছত এসপ্তাহ ভ্ৰমণ সামৰি অহা ১০ এপ্ৰিলত পুনৰ মুম্বাই অভিমুখে উভতিব শচীন টেণ্ডুলকাৰসহ তেওঁলোকৰ পৰিয়াল ।
