জিতুল কুমাৰ গগৈ, যোৰহাটঃ আজি যোৰহাট মালৌ আলি কুহুমযোগনীয়া নৱোদয় যুৱক সংঘৰ প্ৰেক্ষাগৃহত এদিনীয়া কাৰ্যসূচীৰে যোৰহাট জিলা কৃষক মুক্তি সংগ্ৰাম সমিতিৰ ষষ্ঠ দ্বি-বাৰ্ষিক প্ৰতিনিধি সভাখন অনুষ্ঠিত হয়। পুৱা ৯ বজাত পতাকা উত্তোলন আৰু শ্বহীদ তৰ্পনে আৰম্ভ হোৱা প্ৰতিনিধি সভাখনত অংশগ্ৰহন কৰে কেন্দ্ৰীয় সাধাৰণ সম্পাদক বিদ্যুৎ শইকীয়া, কেন্দ্ৰীয় কাৰ্যকৰী সভাপতি ৰাজু বৰপাত্ৰ গোহাঁই, কেন্দ্ৰীয় মুখ্য সাংগঠনিক সম্পাদক ৰিতুমনি হাজৰিকাই। যোৰহাট জিলাৰ প্ৰায় দুই শতাধিক প্ৰতিনিধিয়ে অংশ গ্ৰহন কৰা প্ৰতিনিধি সভাই অৰিন্দম গগৈক সভাপতি, বৰুন লাহন আৰু তপন ফুকনক যুটীয়া সম্পাদক হিচাপে লৈ ৪১ জনীয়া এখনি শক্তিশালী সমিতি গঠন কৰে। অনাগত সময়ত নতুন সমিতিখনে অসমৰ জাতীয় আৰু স্থানীয় সমস্যাসমূহকলৈ এলানি কাৰ্যসূচী লোৱাৰ সিদ্ধান্ত গ্ৰহণ কৰে।
