ৰাইজৰ খবৰ ডিজিটেল, কাজিৰঙাঃ আন্তঃৰাষ্ট্ৰীয় ফিডে ৰেটেড দবাৰু ধ্ৰুৱজ্যোতি সাহাই ৰাষ্ট্ৰীয় জ্যেষ্ঠ আৰবিটাৰৰ যোগ্যতা অৰ্জন কৰিছে৷ যোৱা নিশা অল ইণ্ডিয়া চেছ ফেডাৰেচন চমুকৈ এ আই চি এফৰ দ্বাৰা তেওঁলোকৰ ৱেবছাইটযোগে ধ্ৰুৱজ্যোতি সাহালৈ এই স্বীকৃতি আগবঢ়ায়৷ উল্লেখ্য যে বিগত ১৮ টা বছৰে সাংবাদিকতাৰ স’তে জড়িত হৈ অসম তথা ভাৰতবৰ্ষৰ বিভিন্ন প্ৰান্তৰ পৰা বাতৰি পৰিৱেশন কৰি ইতিমধ্যেই সুখ্যাতি অৰ্জন কৰিছে কাজিৰঙা নিৱাসী সাংবাদিক ধ্ৰুৱজ্যোতি সাহাই৷ পৰিৱেশ সাংবাদিকতা বঁটা, পৰ্যটন সাংবাদিকতা বঁটাকে বিভিন্ন বঁটা-সন্মানেৰে কাজিৰঙা অঞ্চললৈ গৌৰৱ কঢ়িয়াই অনা সাংবাদিক সাহাই সৰুৰেপৰা দবা খেলৰ প্ৰতি আগ্ৰহী আছিল৷ বহুকেইখন আন্তঃৰাষ্ট্ৰীয় ৰেটিং খেল টুৰ্নামেণ্টত অংশগ্ৰহণ কৰিবলৈ সক্ষম হোৱা ধ্ৰুৱজ্যোতি সাহাই যোৱা ২৮ আৰু ২৯ মে’ত নগালেণ্ডৰ ডিমাপুৰত অনুষ্ঠিত হোৱা দবা খেলৰ ৰাষ্ট্ৰীয় জ্যেষ্ঠ আৰবিটাৰৰ চেমিনাৰত অংশগ্ৰহণ কৰিছিল৷ আনহাতে, নগালেণ্ডৰ বিভিন্ন অংশগ্ৰহণকাৰীৰ সমান্তৰালভাৱে অসম তথা উত্তৰ-পূৰ্বাঞ্চলৰ বিভিন্ন অংশগ্ৰহণকাৰী তথা ঝাৰখণ্ডৰ দবাৰু অংশগ্ৰহণ কৰিছিল৷ এই চেমিনাৰৰ পাছতেই অনুষ্ঠিত ৰাষ্ট্ৰীয় জ্যেষ্ঠ আৰবিটাৰৰ পৰীক্ষা বহিবলৈ যোগ্যতা অৰ্জন কৰে ২৭ গৰাকী প্ৰশিক্ষাৰ্থীয়ে৷ এই পৰীক্ষাত সাংবাদিক সাহাই ৮০ শতাংশৰ অধিক নম্বৰ লাভেৰে ‘এ’ গ্ৰেডত উত্তীৰ্ণ হ’বৰ সক্ষম হয়৷ ইয়াৰ লগে লগেই ধ্ৰুৱজ্যোতি সাহাই ৰাষ্ট্ৰীয় জ্যেষ্ঠ আৰবিটাৰৰ যোগ্যতা অৰ্জন কৰে৷ এই পৰীক্ষাত অসমৰ ৰেজাবুল হক, নন্দন বুঢ়াগোহাঁই, মৃণাল কাকতি আৰু শংকৰ বৰুৱাই এ গ্ৰেড পাবৰ সক্ষম হয়৷ ধ্ৰুৱজ্যোতি সাহা গোলাঘাট জিলাখনৰ ভিতৰতে চতুৰ্থগৰাকী ৰাষ্ট্ৰীয় জ্যেষ্ঠ আৰবিটাৰ৷ ইতিপূৰ্বে গোলাঘাট জিলা দবা সন্থাৰ সভাপতি ডায়েৰী প্ৰসাদ উপাধ্যায়, সম্পাদক পল্লৱ গোহাঁই আৰু আন্তঃৰাষ্ট্ৰীয় ৰেটেড দবাৰু অনুজ প্ৰতীম বৰুৱাই এই সন্মান লাভ কৰিছে৷
