ৰাইজৰ খবৰ ডিজিটেল, কাজিৰঙাঃ হাতীখুলি চাহ বাগিছা প্ৰাথমিক বিদ্যালয়ত আজি অনুষ্ঠিত হয় এখনি শিক্ষণ শিকন সামগ্ৰী প্ৰদৰ্শনী মেলা৷ জানিব পৰা মতে, গোলাঘাট পশ্চিম শিক্ষাখণ্ড বোকাখাতৰ কহঁৰা মণ্ডল সমল কেন্দ্ৰৰ অন্তৰ্গত ১০ খন প্ৰাথমিক বিদ্যালয়ৰ মাজত এই শিক্ষণ শিকন সামগ্ৰী প্ৰদৰ্শনী মেলাৰ লগতে প্ৰতিযোগিতাও অনুষ্ঠিত হয়৷
বোকাখাত পশ্চিম শিক্ষাখণ্ডৰ খণ্ড সমল ব্যক্তি প্ৰদীপ শৰ্মা আৰু মণ্ডল কেন্দ্ৰৰ সমন্বয়ক মুকুল বৰা উপস্থিত থকা অনুষ্ঠানত বিদ্যালয়সমূহে ছাত্ৰ-ছাত্ৰীসকলৰ উপযোগী হোৱাকৈ স্বাক্ষৰতা আৰু সাংখ্যিকতা বিষয়ক শিক্ষণ শিকন সামগ্ৰী প্ৰদৰ্শন কৰে৷
ইফালে, শিক্ষকসকলক উৎসাহিত কৰিবলৈ সমল কেন্দ্ৰৰ তৰফৰ পৰা আয়োজন কৰা এই প্ৰদৰ্শনী মেলা তথা প্ৰতিযোগিতাত সাক্ষৰতা বিষয়ত — ১ নং শিলডুবি প্ৰাথমিক বিদ্যালয়ে প্ৰথম, ২ নং হাতীখুলি প্ৰাথমিক বিদ্যালয়ে দ্বিতীয় আৰু ৰঙাজান বাগিছা প্ৰাথমিক বিদ্যালয়ে তৃতীয় পুৰস্কাৰ লাভ কৰে৷
আনহাতে, সাংখ্যিকতা বিষয়ত — শিলডুবি এম ই স্কুলে প্ৰথম, ২ নং কহঁৰা প্ৰাথমিক বিদ্যালয়ে দ্বিতীয় আৰু কাজিৰঙা নেচনেল পাৰ্ক হাইস্কুলে তৃতীয় পুৰস্কাৰ লাভ কৰে৷
শিক্ষণ শিকন সামগ্ৰী প্ৰদৰ্শনী মেলাত ১০ খন বিদ্যালয় শিক্ষকসকল উপস্থিত থাকে৷
