ৰাইজৰ খবৰ ডিজিটেল, কাজিৰঙাঃ নিজ ক্ৰীড়া শৈলীৰ দ্বাৰা কাজিৰঙাৰ চাহ বাগিছা অঞ্চলত ফুটবল খেলক নৱপ্ৰজন্মৰ মাজত জনপ্ৰিয় কৰি তোলাৰ ক্ষেত্ৰত গুৰুত্বপূৰ্ণ অৱদান আগবঢ়োৱা ফুটবলাৰ প্ৰয়াত হলিৰাম কৰ্মকাৰৰ স্মৃতিচাৰণ সভা অনুষ্ঠিত কৰে অসম চাহ জনগোষ্ঠী সাহিত্য সভাৰ কাজিৰঙা শাখাই৷ যোৱা ১৮ ডিচেম্বৰ তাৰিখে প্ৰয়াত ফুটবলাৰগৰাকীৰ কাজিৰঙাৰ ৰঙাজানস্থ বাসগৃহত আদ্যশ্ৰাদ্ধৰ দিনা অনুষ্ঠিত এই স্মৃতিচাৰণ অনুষ্ঠানত অনাতাঁৰ শিল্পী তথা প্ৰাক্তন ফুটবলাৰ নুনু সিং কৰ্মকাৰ, চাহ জনগোষ্ঠী সাহিত্য সভাৰ কাজিৰঙা শাখাৰ সভাপতি পৰমেশ্বৰ পানিকা, বৃহত্তৰ কাজিৰঙা সংবাদ মঞ্চৰ কাৰ্যকৰী সভাপতি ধ্ৰুৱজ্যোতি সাহা, কৰ্মকাৰ সমাজৰ বোকাখাত আঞ্চলিকৰ সম্পাদক শম্ভূ কৰ্মকাৰ, কাজিৰঙা অধ্যয়ন চক্ৰৰ তৰালি শইকীয়া আদিকে ধৰি অঞ্চলটোৰ বিশিষ্ট ব্যক্তিসকল উপস্থিত থাকে৷ চাহ জনগোষ্ঠী সাহিত্য সভাৰ কাজিৰঙা শাখাৰ সম্পাদক বিতোপন মাজিয়ে আঁত ধৰা স্মৃতিচাৰণ অনুষ্ঠানত প্ৰয়াত কৰ্মকাৰৰ প্ৰতিচ্ছবিত শ্ৰদ্ধাঞ্জলি জ্ঞাপন কৰাৰ পাছতে বিভিন্নজনে ফুটবলাৰগৰাকীক সুঁৱৰি বক্তব্য আগবঢ়ায়৷ শিল্পী তথা ফুটবলাৰ নুনু সিং কৰ্মকাৰে প্ৰয়াত কৰ্মকাৰৰ স’তে একালত একেলগে অসমৰ ভিন্ন প্ৰান্তত ফুটবল খেলাৰ কথা সুৱঁৰি কয়, ৮০-৯০ৰ দশকত প্ৰতিপক্ষৰ বাবে আতংকৰ নাম ডিফেন্স ফুটবলাৰ হলিৰাম কৰ্মকাৰ৷ একালত কাজিৰঙাত ফুটবল বুলিলেই ৰঙাজানৰ হলিৰামৰ নাম সকলোৰে মুখত বুলি উল্লেখ কৰি সংবাদ মঞ্চৰ ধ্ৰুৱজ্যোতি সাহাই কয় কাজিৰঙাৰ নৱপ্ৰজন্মৰ মাজত ফুটবল জনপ্ৰিয় কৰাৰ ক্ষেত্ৰত তেখেতৰ যথেষ্ট অৱদান আছে৷ ইফালে, আগন্তুক দিনত প্ৰয়াত হলিৰাম কৰ্মকাৰৰ সোঁৱৰণত ফুটবল খেল অথবা এটা ফুটবল একাডেমী স্থানীয়ভাৱে স্থাপন কৰাৰ প্ৰস্তাৱ আগবঢ়াই চাহ জনগোষ্ঠী সাহিত্য সভাৰ সভাপতি পৰমেশ্বৰ পানিকাই ফুটবলাৰগৰাকীৰ স্মৃতি যুগমীয়া কৰি ৰাখিবলৈ সকলোকে আহ্বান জনায়৷
