ৰাইজৰ খবৰ ডিজিটেল, কাজিৰঙাঃ কাজিৰঙাত গঁড়ৰ আক্ৰমণত নিহত হ’ল এজন কৃষক৷ আজি পুৱাৰ ভাগত কৃষি পথাৰত কৃষিকৰ্মত ব্যস্ত থকা অৱস্থাতে গঁড়ৰ অতৰ্কিত আক্ৰমণত নিহত হয় অমৰাম গণক নামৰ লোকজন৷ ঘটনা সন্দৰ্ভত কহঁৰাৰ বনাঞ্চলিক বিষয়া বিভূতি ৰঞ্জন গগৈয়ে জানিব দিয়া মতে, আজি পুৱাৰ ভাগত কাজিৰঙা ৰাষ্ট্ৰীয় উদ্যানৰ কহঁৰা বনাঞ্চলৰ কাষৰীয় ২ নং ম’হপৰা নিবাসী অমৰাাম গণক (৩০) পুৱা ৬-৩০ মান বজাত কৃষিকৰ্মৰ বাবে উদ্যানৰ কাষতে থকা পথাৰলৈ বুলি ওলাই যায়৷ তেনেতে পথাৰৰ নিচেই কাষতে লাগি থকা কহঁৰা বনাঞ্চলৰ পৰা ওলাই অহা এটা গঁড়ে অতৰ্কিতে আক্ৰমণ চলাই কৃষক অমৰামক৷ গঁড়ৰ আক্ৰমণত বুকু, পিঠি আদিত গুৰুতৰ আঘাতপ্ৰাপ্ত হৈ ধৰাশায়ী হৈ থকা অমৰামক পথাৰৰ কাষৰে মৰা ডিফলু নদীৰ পাৰৰ পৰা উদ্ধাৰ কৰি ততাতৈয়াকৈ স্থানীয় লোকে শ্বহীদ বেজা বৈঞ্চৱ কহঁৰা আদৰ্শ চিকিৎসালয়ত ভৰ্তি কৰে যদিও চিকিৎসকে অমৰামক মৃত ঘোষণা কৰে৷ ইফালে, মৃত অমৰামৰ পৰিয়াললৈ বনবিভাগৰ তৰফৰ পৰা এককালীন সাহায্য আগবঢ়োৱাৰ ব্যৱস্থা কৰা হৈছে বুলি জানিব পৰা গৈছে৷
