মুকুল ফুকন, শিৱসাগৰঃ ঐতিহাসিক শিৱসাগৰ নগৰৰ পিয়লি ফুকন ষ্টেডিয়ামত দেওবাৰে দহ সহস্ৰাধিক দিহা নামৰ শিল্পীয়ে তিনি মাহ জোৰা নেৰানেপেৰা প্ৰচেষ্টা অন্তত পৰিৱেশন কৰিলে দিহানাম। শিৱসাগৰ যুগলবন্দী সাংস্কৃতিক কলা কেন্দ্ৰৰ উদ্যোগত অনুষ্ঠিত হোৱা বহু আকাংক্ষিত বহু প্ৰতীক্ষিত এই বৃহৎ অনুষ্ঠানটি উদ্বোধন কৰে আউনীআটী সত্ৰৰ সত্ৰাধিকাৰ ড° পীতাম্বৰ দেৱগোস্বামীয়ে। ইয়াৰ পূৰ্বে সত্ৰাধিকাৰ গৰাকীক বায়নে গায়নে মঞ্চলৈ আদৰি আনি সম্বৰ্ধনা জনোৱা হয়।
অনুষ্ঠানত বিশিষ্ট ব্যক্তি অতিথি ৰূপে উপস্থিত থাকে স্থানীয় বিধায়ক তথা ৰাইজৰ দলৰ সভাপতি অখিল গগৈ। উপস্থিত সকলো শ্ৰোতা দৰ্শকৰ অপেক্ষা উৎকণ্ঠাৰ ওৰ পেলাই অৱশেষত অসম বুক অব ৰেকৰ্ডছৰ প্ৰতিনিধিয়ে যেতিয়া দহ পৰা একলৈ ওলোটাকৈ গণনা কৰি অন্ত পৰা মাত্ৰকে বাজি উঠিল নাগাৰা, খোলৰ শব্দ। মুহূৰ্তততে ৰজনজনাই উঠিল পিয়লি ফুকন ষ্টেডিয়াম৷ দিহানামেৰে মুখৰিত হ’ল শিৱসাগৰৰ আকাশ -বতাহ। অসমৰ উজনি পৰা নামনিলৈ শদিয়া পৰা ধুবুৰীলৈ দিহানামৰ শিল্পীয়ে ভাগ লোৱা এই অনুষ্ঠানতে বিশিষ্ট দিহানামৰ শিল্পী নিৰ্মলা দাসক ‘তেজস্বীনী’, স্নিগ্ধা বৰাক ‘কণ্ঠজ্যোতি’ আৰু সঙ্গীতা বৰাক ‘কণ্ঠ গৌৰৱ’ সন্মানেৰে বিভুষিত কৰা হয়। এই সমগ্ৰ অনুষ্ঠানটিৰ মুখ্য ব্যৱস্থাপক হিচাপে আছিল যুগলবন্দী সাংস্কৃতিক কলা কেন্দ্ৰৰ সভানেত্ৰী নিৰ্মলা দাস।
