ৰক্তদান জীৱনদান
ৰক্তদান কৰিবলৈ বহুতে ভয় কৰে। আন কোনোবাই আকৌ দ্বিধাবোধ কৰে। কিন্তু, এটোপাল তেজৰ মূল্য অসীম। আপুনি-মই ৰক্তদান কৰি এটা জীৱন বচাই তুলিব পাৰোঁ। সেয়ে সুযোগ-সুবিধা পালেই নিয়ম অনুযায়ী ৰক্তদান কৰিব লাগে। সম্প্ৰতি মানুহৰ মাজত ৰক্তদান কৰাৰ মানসিকতা বৃদ্ধি পাইছে। চৰকাৰী-বেচৰকাৰী বিভিন্নজনৰ সজাগতাৰ বাবেই ৰক্তদানেৰে জীৱন দান কৰাত বিভিন্নজন আগ্ৰহী হৈছে। আজি ১৪ জুন, বিশ্ব ৰক্তদান দিৱস উপলক্ষে বোকাখাত নিৱাসী, লেখক সুব্ৰত পুৰকায়স্থই ৰক্তদান দিৱসৰ তাৎপৰ্য ব্যাখ্যা আগবঢ়াইছে এই লেখাৰ জৰিয়তে।
আজি ১৪ জুন। বিশ্ব ৰক্তদান দিৱস। ২০০৪ চনৰ ১৪ জুন তাৰিখে পোনপ্ৰথমবাৰৰ বাবে বিশ্ব ৰক্তদান দিৱস পালন কৰা হয়। তেতিয়াৰে পৰা সমগ্ৰ বিশ্বতে এই দিৱস পালন কৰা হৈছে। ৰক্তদানৰ ক্ষেত্ৰত সজাগতা সৃষ্টি কৰা আৰু ৰক্তদাতাক ধন্যবাদ জনোৱাই হ’ল এই দিৱসৰ মূল উদ্দেশ্য।
বিশ্ব ৰক্তদান দিৱস হৈছে বিশ্ব স্বাস্থ্য সংস্থাই পালন কৰা আঠটা বিশ্বব্যাপী জনস্বাস্থ্য অভিযানৰ অন্যতম। বিশ্ব স্বাস্থ্য সংস্থাই কাৰ্ল লেণ্ডষ্টাইনাৰৰ জন্মদিনটো বিশ্ব ৰক্তদাতা দিৱস হিচাপে উদ্যাপন কৰাৰ সিদ্ধান্ত লয়। লেণ্ডষ্টেইনাৰ আছিল অষ্ট্ৰিয়ান আমেৰিকান ইমিউন’লজিষ্ট, পেথ’লজিষ্ট। ১৯৩০ চনত তেওঁ ব্লাড গ্ৰুপ আৰু আধুনিক ৰক্ত সঞ্চালন ব্যৱস্থাৰ বিকাশ সম্বন্ধে কৰা কামৰ বাবে নোবেল বঁটা লাভ কৰিছিল।
এই বছৰ বিশ্ব ৰক্তদান দিৱসৰ মূলমন্ত্ৰ হৈছে “20 years of celebrating giving thank you blood donors” এই বিষয়বস্তুৱে ৰক্তদাতাৰ প্ৰতি কৃতজ্ঞতা প্ৰকাশৰ বিষয়টো প্ৰতিফলিত কৰিছে। বিগত দুটা দশক ধৰি বিশ্ব ৰক্তদাতা দিৱসে স্বেচ্ছামূলক ৰক্তদাতাসকলৰ প্ৰতি অপৰিসীম কৃতজ্ঞতা প্ৰকাশৰ এক মঞ্চ হিচাপে কাম কৰি আহিছে।
মেডিকেল আৰু ছেলছ্ ৰিপ্ৰেজেনটেটিভচ্ৰ অন্যতম শক্তিশালী সংগঠন চেণ্টাৰ অৱ মেডিকেল এণ্ড ছেলছ্ ৰিপ্ৰেজেনটেটিভচ্ ইউনিয়নে (উত্তৰ পূৰ্বাঞ্চল) (জনপ্ৰিয় নাম চি আৰ ইউ) নিয়মীয়াকৈ ৰক্তদান কাৰ্যসূচীত অংশগ্ৰহণ কৰি আহিছে।
ৰক্তদান কৰি আৰ্তজনক সেৱা আগবঢ়োৱা প্ৰতিগৰাকী ৰক্তদাতালৈ বিশ্ব ৰক্তদান দিৱসৰ আন্তৰিক শুভেচ্ছা জ্ঞাপন কৰিছোঁ।
মনত ৰাখিব ৰক্তদান জীৱনদান।
