যোৰহাট প্ৰিমীয়াৰ লীগ ক্ৰিকেটত
ইলাইট ঈগলছ আৰু যোৰহাট ফেলকনৰ জয়লাভ
জিতুল কুমাৰ গগৈ, যোৰহাটঃ ক্ৰিকেটাৰ্ছ অব যোৰহাটৰ উদ্যোগত যোৰহাট ষ্টেডিয়ামত চলি থকা প্ৰথম বাৰ্ষিক যোৰহাট প্ৰিমিয়াৰ লীগ (চিজন-১) ক্ৰিকেট প্ৰতিযোগিতাখনৰ যোৱা ২ নৱেম্বৰত অনুষ্ঠিত হয় দুখন খেল। তাৰে প্ৰথম খেলখনত ইলাইট ঈগলছে ৪ উইকেটত আৰু আনখনত যোৰহাট ফেলকনে ৯ উইকেটত জয়লাভ কৰিছে। যোৰহাট চুপাৰ জায়েন্ট আৰু ইলাইট ঈগলছৰ মাজত অনুষ্ঠিত প্ৰথম খেলখনত চুপাৰ জায়ন্টে প্ৰথমেই বেটিং কৰি ঈগলছ দলৰ দিব্যজ্যোতি বৰাৰ বলিং প্ৰতাপত দলটোৱে নিৰ্ধাৰিত অ’ভাৰত ৯টা উইকেট হেৰুৱাই মাত্ৰ ৭৫ ৰান সংগ্ৰহ কৰিবলৈ সক্ষম হয়। প্ৰত্যুত্তৰত ঈগলছে ১৭ অ’ভাৰত ৬টা উইকেটৰ বিনিময়তে ৭৬ ৰান কৰি সহজে বিজয় সাব্যস্ত কৰে। এইখন খেলত দিব্যজ্যোতি বৰাই ৪ অ’ভাৰত ১৬ ৰান খৰছ কৰি ৫টা উইকেট দখন কৰে। আনহাতে ৰেডিয়েন্ট ৰাইন’জ আৰু যোৰহাট ফেলকন দলৰ মাজত অনুষ্ঠিত দ্বিতীয়খন খেলত ৰেডিয়েন্টে প্ৰথমে বেটিং কৰি নিৰ্ধাৰিত অ’ভাৰত ৬টা উইকেট হেৰুৱাই ৯৯ ৰান সংগ্ৰহ কৰে। প্ৰত্যুত্তৰত ফেলকন দলে মানস শইকীয়াৰ অপৰাজিত অৰ্ধশতকৰ (৫৩) সহায়ত ১১.৩ অ’ভাৰত এটা উইকেটৰ বিনিময়তে ১০০ ৰান কৰি ৯ উইকেটৰ বৃহৎ ব্যৱধানত জয়লাভ কৰে।
