যোৰহাট প্ৰিমিয়াৰ লীগ ক্ৰিকেট
মৰিয়নি টাইটান আৰু জয়হিন্দ ৱাৰিয়ৰ্ছৰ জয়লাভ
জিতুল কুমাৰ গগৈ, যোৰহাটঃ বলাৰৰ দপদপনি অব্যাহত থকা জে পি এলত কোনো এজন বেটছমেনে সফলতা লাভ কৰিবলৈ সক্ষম নোহোৱাত প্ৰতিযোগিতাখন ক্ৰমাৎ আকষণীয় ৰূপলৈ আহিছে আৰু পইন্টৰ তালিকাত যোৰহাট ফেলকন দলে শীৰ্ষস্থান দখল কৰি আছে। যোৰহাট ষ্টেডিয়ামত ক্ৰিকেটাৰ্ছ অব যোৰহাটৰ উদ্যোগত চলি থকা প্ৰথম বাৰ্ষিক যোৰহাট প্ৰিমিয়াৰ লীগ (চিজন-১) ক্ৰিকেট প্ৰতিযোগিতাখনৰ বুধবাৰে অনুষ্ঠিত হয় দুখন খেল। তাৰে প্ৰথম খেলখনত মৰিয়নি টাইটান দলে ইলাইট ঈগলছ দলক ৪ উইকেটত আৰু দ্বিতীয়খনত জয়হিন্দ ৱাৰিয়ৰ্ছ দলে কাইনেটিক কিংছ দলকো ৪ উইকেটত পৰাস্ত কৰে। ইলাইট ঈগলছ আৰু মৰিয়নি টাইটান দলৰ মাজত অনুষ্ঠিত বুধবাৰৰ প্ৰথম খেলখনত ঈগলছ দলে প্ৰথমে বেটিং কৰি নিৰ্ধাৰিত অ’ভাৰত ৭টা উইকেট হেৰুৱাই ৭৩ ৰান সংগ্ৰহ কৰে। প্ৰত্যুত্তৰত টাইটান দলে ১৬.২ অ’ভাৰত ৬টা উইকেটৰ বিনিময়তে ৭৪ ৰান সংগ্ৰহ কৰি বিজয় সাব্যস্ত কৰে। এই খেলখনত মৰিয়নি টাইটান দলৰ ঠাকুৰ জীতেন্দ্ৰ সিঙে মেন অব দা মেছ সন্মান লাভ কৰে। আনহাতে কাইনেটিক কিংছ আৰু জয়হিন্দ ৱাৰিয়ৰ্ছ দলৰ মাজত বুধবাৰে অনুষ্ঠিত দ্বিতীয়খন খেলত কিংছ দলে প্ৰথমে বেটিং কৰি নিৰ্ধাৰিত অ’ভাৰত ৱাৰিয়ৰ্ছ দলৰ দীপু শইকীয়া আৰু বিকি দত্তৰ নিয়ন্ত্ৰিত বলিঙৰ ফলত আটাইকেইটা উইকেটৰ বিনিময়ত মাত্ৰ ৭৩ ৰান সংগ্ৰহ কৰিবলৈ সক্ষম হয়। প্ৰত্যুত্তৰত ৱাৰিয়ৰ্ছ দলে ১৮.৫ অ’ভাৰত ৬টা উইকেটৰ বিনিময়তে ৭৭ ৰান সংগ্ৰহ কৰি বিজয় সাব্যস্ত কৰে। এই খেলখনত দীপু শইকীয়াই ৪ অ’ভাৰত ৬ ৰান খৰচ কৰি ৪টা উইকেট অৰ্জন কৰাৰ লগতে মেন অব দা মেছ সন্মানো লাভ কৰে। ইয়াৰ উপৰিও ৱাৰিয়ৰ্ছ দলৰ বিকি দত্তই ৩.৪ অ’ভাৰত ১৬ ৰান দি ৩টা, জয়ন্ত মাধৱ শৰ্মাই ২টা উইকেট লাভ কৰাৰ বিপৰীতে কিংছ দলৰ অনন্ত বৰাই ৪ অ’ভাৰত ৪ ৰান খৰচ কৰি ৩টা উইকেট লাভ কৰে।
