জিতুল কুমাৰ গগৈ, যোৰহাটঃ সদ্য সমাপ্ত সংযুক্ত ভাৰতীয় খেল ফাউণ্ডেশ্যনৰ দশম সংখ্যক আন্তঃৰাষ্ট্ৰীয় খেল ২০২৪ প্ৰতিযোগিতাৰ সাতোঁৰ ক্ৰীড়াত ভাৰতীয় দলৰ হৈ প্ৰতিনিধিত্ব কৰা অসম তথা যোৰহাটৰ সাতোঁৰ খেলুৱৈ ভাৰ্গৱী হাজৰিকাই তিনিটাকৈ স্বৰ্ণ পদক জয়েৰে যোৰহাটৰ লগতে অসমলৈ গৌৰৱ কঢ়িয়াই আনিছে।
মালয়েছিয়া আৰু চিংগাপুৰ এই দুইস্থানত যোৱা ২২ ৰ পৰা ৩০ ছেপ্টেম্বৰলৈকে অনুষ্ঠিত সংযুক্ত ভাৰতীয় খেল ফাউণ্ডেশ্যনৰ আন্তঃৰাষ্ট্ৰীয় খেল প্ৰতিযোগিতাখনৰ সাতোঁৰ ক্ৰীড়াত জাতীয় দলক প্ৰতিনিধিত্ব কৰা যোৰহাটৰ সাতোঁৰ খেলুৱৈ ভাৰ্গৱী হাজৰিকাই ২৫ৰ পৰা ২৯ বছৰ বয়সৰ শাখাত ১০০ আৰু ২০০ মিটাৰ বাটাৰ ফ্লাই, ১০০ মিটাৰ বেষ্ট ষ্ট্ৰোক এই তিনিটা ইভেন্টত খেলি তিনিওটাতে একোটাকৈ সৰ্বমুঠ ৩টা স্বৰ্ণ পদক অৰ্জন কৰিবলৈ সক্ষম হয়। প্ৰতিযোগিতাখনত শ্ৰীলংকা, পাকিস্থান, মালয়েছিয়া, আফগানিস্তান, ডুবাইকে আদিকৰি দহখনকৈ দেশৰ খেলুৱৈয়ে অংশ গ্ৰহণ কৰা এই আন্তঃৰাষ্ট্ৰীয় সাঁতোৰ প্ৰতিযোগিতাখনত পদক অৰ্জন কৰা ভাৰ্গৱী হাজৰিকাই যোৰহাট ছুইমিং ছ’চাইটিৰ জলক্ৰীড়া প্ৰকল্পতে সাতোঁৰৰ আদি পাঠ গ্ৰহণ কৰিছিল। যোৰহাটৰ মালৌ আলিৰ নিবাসী পিতৃ গকুল হাজৰিকা আৰু মাতৃ ভাৰতী হাজৰিকাৰ কন্যা তথা বন্ধন বেংকৰ সহ পৰিচালক ভাৰ্গৱী হাজৰিকাৰ এই সফলতাত যোৰহাটৰ ক্ৰীড়াপ্ৰেমী ৰাইজে খেলুৱৈ গৰাকীক লৈ গৌৰৱ অনুভৱ কৰাৰ লগতে তেওঁলৈ আন্তৰিক শুভেচ্ছা জ্ঞাপন কৰিছে।
