যোৰহাটৰ ক্ৰীড়া জগতলৈ গৌৰৱ কঢ়িয়ালে চাৰি খেলুৱৈয়ে
পুৰুষসহ তিনি মহিলা খেলুৱৈৰ ৰাজ্যিক দলত স্থান লাভ
জিতুল কুমাৰ গগৈ, যোৰহাটঃ বিভিন্ন ক্ৰীড়া ক্ষেত্ৰত এটাৰ পাছত এটা গৌৰৱ কঢ়িয়াই থকা যোৰহাটৰ ক্ৰীড়া জগতৰ লগতে শতবৰ্ষ গৰকা যোৰহাট জিলা ক্ৰীড়া সন্থালৈ আকৌ আহিল এক গৌৰৱৰ বাৰ্তা। পুনৰ যোৰহাটলৈ গৌৰৱ কঢ়িয়াবলৈ সক্ষম হৈছে এজন পুৰুষ আৰু মহিলাৰ তিনিগৰাকীকৈ খেলুৱৈ মুঠ চাৰিজনকৈ খেলুৱৈয়ে ৰাষ্ট্ৰীয় প্ৰতিযোগিতাৰ বাবে অসম ৰাজ্যিক দলত স্থান লাভেৰে। যোৰহাটত ৰাষ্ট্ৰীয় ছাব-জুনিয়ৰ ফুটবল প্ৰতিযোগিতা অনুষ্ঠিত কৰাৰ পাছত এ আই এফ এফ’ৰ পৰা যোৰহাটত এখন আগশাৰীৰ ফুটবল প্ৰতিযোগিতা ‘সন্তোষ ট্ৰফী’ অনুষ্ঠিত কৰিবলৈ অফাৰ পোৱাৰ পাছতে কালি অহা আৰু এটি শুভ সংবাদে যোৰহাট জিলা ক্ৰীড়া সন্থাক গৌৰাম্বিত কৰিছে। অসম ক্ৰিকেট সন্থা আৰু অসম ফুটবল সন্থাই কালি ঘোষণা কৰা অনুসৰি যোৰহাট জিলা ক্ৰীড়া সন্থাৰ চাৰিজন খেলুৱৈক এজন ক্ৰিকেটত আৰু তিনিগৰাকীক ফুটবলত অসম ৰাজ্যিক দললৈ নিৰ্বাচিত কৰা কৰিছে। সেই ঘোষণা অনুসৰি ৰঞ্জী ট্ৰফীৰ বাবে অসম ৰাজ্যিক ক্ৰিকেটৰ মূল পুৰুষ দলটিত যোৰহাট জিলাৰ উদীয়মান যুৱ ক্ৰিকেট খেলুৱৈ যোৰহাটৰ চৰাইবাহীৰ ভাৰ্গৱ দত্তই নিজৰ স্থান সুনিশ্চিত কৰি জিলাখনলৈ আনন্দ কঢ়িয়াই অনাৰ উপৰিও অসম ৰাজ্যিক ছিনিয়ৰ মহিলা ফুটবল দলটিত যোৰহাট জিলাৰ কাকজানৰ তিনিগৰাকীকৈ ফুটবল খেলুৱৈ ক্ৰমে জ্যোতিকা মিলি, পূজা শইকীয়া আৰু মৃণালী বৰাই অসম ৰাজ্যিক দলটিত স্থান লাভ কৰি জিলাখনক গৌৰৱান্বিত কৰিছে। উল্লেখযোগ্য যে, মৃণালী বৰাই শেহতীয়াকৈ নিজৰ শিক্ষা সমাপ্ত কৰি মৃণালীয়ে এন আই এছৰ ফুটবল প্ৰশিক্ষক হিচাপে কাৰ্যনিৰ্বাহ কৰি আছে। এনেদৰে সফলতা লাভ কৰা আটাইকেজন খেলুৱৈকে যোৰহাট জিলা ক্ৰীড়া সন্থাই আন্তৰিক অভিনন্দন জনাইছে।
