কাজিৰঙাৰ সাংবাদিক ধ্ৰুৱজ্যোতি সাহালৈ বেষ্ট আসাম প্লেয়াৰৰ খিতাপ

নিউজ ডেস্ক ৰিপ’ৰ্ট, ৰাইজৰ খবৰ ডিজিটেলঃ
ছিপাঝাৰত অনুষ্ঠিত হোৱা আন্তঃৰাষ্ট্ৰীয় ৰেটিং দবা প্ৰতিযোগিতাত কাজিৰঙাৰ জ্যেষ্ঠ সাংবাদিক তথা ৰাইজৰ খবৰ ডিজিটেলৰ পৰিচালন সম্পাদক ধ্ৰুৱজ্যোতি সাহাই বেষ্ট আসাম প্লেয়াৰৰ খিতাপ লাভ কৰিবলৈ সক্ষম হৈছে৷ এই সন্মানত অল ইণ্ডিয়া চেছ্ ফেডাৰেচন চমুকৈ এ আই চি এফৰ দ্বাৰা স্বীকৃতিপ্ৰাপ্ত সদৌ অসম দবা সন্থাৰ তৰফৰ পৰা মানপত্ৰ আৰু নগদ ধন প্ৰদান কৰা হয়৷ উল্লেখ্য যোৱা ৩ জানুৱাৰীৰ পৰা ৭ জানুৱাৰী পৰ্যন্ত মংগলদৈৰ ছিপাঝাৰত অনুষ্ঠিত হৈছিল প্ৰথম ছিপাঝাৰ আন্তঃৰাষ্ট্ৰীয় ফিডে ৰেটিং দবা প্ৰতিযোগিতা৷ ছিপাঝাৰ মহাবিদ্যালয়ৰ ইনডৰ ষ্টেডিয়ামত অনুষ্ঠিত হোৱা এই প্ৰতিযোগিতাত দেশৰ বিভিন্ন প্ৰতিযোগিতাত ডেৰ শতাধিক দবাৰুৱে অংশগ্ৰহণ কৰিছিল৷ আৰম্ভণি অনুষ্ঠানত সদৌ অসম দবা সন্থাৰ সভাপতি কন্দৰ্প কলিতা, সম্পাদক ৰাজীৱ ধৰ, গুৱাহাটী জিলাৰ মুকুতা ডেকা, মুখ্য আৰবিটাৰ ৰবিকান্ত তিৱাৰীৰ লগতে অঞ্চলটোৰ বিশিষ্ট লোক, উদ্যোক্তাৰ লগতে দবাৰু আৰু অভিভাৱকসকল উপস্থিত আছিল৷ মুখ্য আৰবিটাৰ ৰবিকান্ত তিৱাৰীৰ লগতে সহকাৰী হিচাপে থকা আৰবিটাৰ হিচাপে থকা নীতেশ কুমাৰ পৰ্বত, জ্যেষ্ঠ ৰাষ্ট্ৰীয় আৰবিটাৰ হিচাপে নগালেণ্ডৰ বেকখু চহু (Soho), নামৰূপৰ দেবেন্দ্ৰ শৰ্মা, হোজাইৰ সঞ্জয় দাসৰ তত্ত্বাৱধানত সমগ্ৰ খেল পৰিচালনা কৰা হয়৷ আনহাতে, ৭ জানুৱাৰীত অনুষ্ঠিত হোৱা সামৰণি অনুষ্ঠানত টুৰ্ণামেণ্টৰ মূল শাখাত বিজয়ী হোৱা শান্তু মণ্ডলে প্ৰথম পুৰস্কাৰ লাভ কৰাৰ বিপৰীতে চনী কিশান আৰু তন্ময় ৰাজবংশীয়ে ক্ৰমাৎ দ্বিতীয় আৰু তৃতীয় স্থান দখল কৰে৷ আনহাতে, টুৰ্ণামেণ্টত বেষ্ট আসাম প্লেয়াৰৰ সন্মান লাভ কৰে আন্তঃৰাষ্ট্ৰীয় ৰেটেড দবাৰু ধ্ৰুৱজ্যোতি সাহাই৷ কাজিৰঙাৰ পৰা অসমীয়া প্ৰতিদিনত সাংবাদিক হিচাপে কৰ্মৰত তথা বৃহত্তৰ কাজিৰঙা সংবাদ মঞ্চৰ কাৰ্যকৰী সভাপতি ধ্ৰুৱজ্যোতি সাহাই ইতিমধ্যে জ্যেষ্ঠ ৰাষ্ট্ৰীয় আৰবিটাৰৰ সন্মান লাভ কৰিবলৈয়ো সক্ষম হৈছে৷