দ্যা গ্ৰেটেষ্ট শ্ব’ অন আৰ্থ

— সুব্ৰত পুৰকায়স্থ

আজিৰে পৰা পেৰিছত আৰম্ভ অলিম্পিক মহাৰণ। ২৬ জুলাইৰ পৰা ১১ আগষ্টলৈ অনুষ্ঠিত হ’ব লগীয়া বিশ্বৰ এই সৰ্বোচ্চ ক্ৰীড়া সমাৰোহৰ বাবে সকলোৱে আশাৰে বাট চাই আছে। অলিম্পিকত ভাৰতে এতিয়ালৈকে ৩৫ টা পদক লাভ কৰিছে। ইয়াৰে ১০ টা স্বৰ্ণ, ৯ টা ৰূপ আৰু ১৬ টা ব্ৰঞ্জৰ পদক। অলিম্পিকত ভাৰতৰ পদক লাভৰ ক্ষেত্ৰত শ্ৰেষ্ঠ প্ৰদৰ্শন আছিল টকিঅ’ অলিম্পিকত। তাত ভাৰতে ৭ টা পদকেৰে তালিকাৰ ৪৮ স্থানত আছিল।

পেৰিছ অলিম্পিকত ভাৰতৰ ১১৭ গৰাকী খেলুৱৈয়ে ১৬ টা ইভেন্টত অংশগ্ৰহণ কৰিব। ইয়াৰে ৭০ গৰাকী পুৰুষ আৰু ৪৭ গৰাকী মহিলা। অসমৰ বক্সাৰ লাভলীনা বৰগোহাঁই ভাৰতীয় দলৰ অন্যতম সদস্য। মণিপুৰৰ ভাৰোত্তোলক মীৰাবাঈ চানু উত্তৰ পূৰ্বাঞ্চলৰ আনগৰাকী ক্ৰীড়াবিদ। উল্লেখযোগ্য যে উত্তৰ পূৰ্বাঞ্চলৰ পৰা এই দুগৰাকী খেলুৱৈয়ে ভাৰতীয় দলক প্ৰতিনিধিত্ব কৰিব। অলিম্পিকৰ পদক বিজয়ী শ্বুটাৰ গগন নাৰঙ ভাৰতীয় দলৰ চীফ দ্য মিছন হিচাপে দলটোক নেতৃত্ব দিব। পেৰিছত ভাৰতীয় দলৰ পতাকা বহন কৰিব ছৰথ কমল আৰু পি ভি সিন্ধুয়ে।

১২৪ বছৰীয়া অলিম্পিকৰ গৌৰৱোজ্জল ইতিহাসত এতিয়ালৈকে পাঁচ গৰাকী অসমীয়া ক্ৰীড়াবিদে অংশগ্ৰহণৰ সুবিধা লাভ কৰিছে। তেখেতসকল হ’ল ডা: টালিমেৰণ আও, দীপাংকৰ ভট্টাচাৰ্য্য, শিৱ থাপা, জয়ন্ত তালুকদাৰ আৰু লাভলীনা বৰগোহাঁই। ইয়াৰে লাভলীনা বৰগোহাঁই হৈছে অলিম্পিকত পদক লাভ কৰা প্ৰথম আৰু একমাত্ৰ অসমীয়া।

লাভলীনা বৰগোহাঁইৰ বাহিৰেও আন চাৰি গৰাকী অসমীয়া পেৰিছ অলিম্পিকত বিভিন্ন ধৰণে অংশগ্ৰহণ কৰিব। প্ৰশিক্ষক প্ৰণামিকা বৰা, ফটোগ্ৰাফাৰ ঋতুৰাজ কোঁৱৰ, গীতিকা তালুকদাৰ আৰু ITBP ৰ কমাণ্ডাৰ মনজুৰ আহমেদ।

উল্লেখযোগ্য যে অলিম্পিকৰ ইতিহাসত পোনপ্ৰথমবাৰৰ বাবে ষ্টেডিয়ামৰ বাহিৰত উদ্বোধনী অনুষ্ঠান অনুষ্ঠিত হ’ব। ৰিভাৰ পেৰেডেৰে এই অনুষ্ঠান অনুষ্ঠিত হ’ব। চেইন নদীত ৬ কিলোমিটাৰ জোৰা এই ৰিভাৰ পেৰেডৰ বাবে সকলো উৎসুক হৈ আছে। মুঠতে এক ব্যতিক্ৰমী আৰু সুন্দৰ ৰূপত অনুষ্ঠিত হ’ব পেৰিছ অলিম্পিক।

আমি আশা কৰিম ভাৰতীয় দলটোৱে নিজৰ সৰ্বোচ্চ উজাৰি দেশবাসীক গৌৰৱান্বিত কৰি তুলিব। প্ৰতি গৰাকী ভাৰতীয় খেলুৱৈৰ প্ৰতি আন্তৰিক শুভেচ্ছা জ্ঞাপন কৰিছোঁ। লাভলীনা বৰগোহাঁইৰ প্ৰতি আমাৰ সকলোৰে শুভকামনা সদায়ে আছে। আমি আশা কৰিম লাভলীনাই অসমৰ নাম, ভাৰতৰ নাম পেৰিছত উজলাই তুলিব।

Citius, Altius, Fortius – Communiter