অখিল ভাৰতীয় ভোজপুৰী ছাত্ৰ সন্থাৰ সম্বৰ্ধনা অনুষ্ঠান
ৰাইজৰ খবৰ ডিজিটেলৰ পৰিচালন সম্পাদক ধ্ৰুৱজ্যোতি সাহালৈ যুৱ সাংবাদিকতা বঁটা
ৰাইজৰ খবৰ ডিজিটেল, কাজিৰঙা, ৯ জুনঃ ৰাইজৰ খবৰ ডিজিটেলৰ পৰিচালন সম্পাদক তথা অসমীয়া প্ৰতিদিন কাকতৰ কাজিৰঙাৰ সাংবাদিক ধ্ৰুৱজ্যোতি সাহালৈ আগবঢ়োৱা হৈছে যুৱ সাংবাদিকতা বঁটা৷ অখিল ভাৰতীয় ভোজপুৰী ছাত্ৰ সন্থাৰ গোলাঘাট জিলা সমিতিৰ উদ্যোগত অহা ১৬ জুনত বোকাখাত পুৱতি সাহিত্য সভা ভৱনত অনুষ্ঠিত হ’ব লগা এক সম্বৰ্ধনা অনুষ্ঠানত সাংবাদিক সাহাৰ লগতে ডি ৱাই ৩৬৫ সংবাদ প্ৰতিষ্ঠানৰ বোকাখাতৰ সাংবাদিক ধৰ্মেশ্বৰ হাজৰিকাকো যুৱ সাংবাদিকতা বঁটা প্ৰদান কৰিব সংগঠনটোৱে৷ ইফালে, একেদিনাই বোকাখাতৰ জ্যেষ্ঠ সাংবাদিক-লেখক, বোকাখাত প্ৰেছ ক্লাৱৰ সভাপতি ভৱানন্দ কলিতালৈ সংগঠনটোৱে জ্যেষ্ঠ সাংবাদিকতা বঁটা প্ৰদান কৰিব৷
উল্লেখ্য, অহা ১৬ জুনত ছাত্ৰ সংগঠনটোৰ উদ্যোগত হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত উত্তীৰ্ণ কৃতী ছাত্ৰ-ছাত্ৰীসকলক অভিনন্দন জনোৱাৰ উদ্দেশ্যে এক সম্বৰ্দ্ধনা অনুষ্ঠানৰ আয়োজন কৰা হৈছে৷ উক্ত অনুষ্ঠানতে বোকাখাতৰ সঞ্জীৱ শইকীয়া আৰু প্ৰাঞ্জল গগৈলৈ ক্ৰীড়া সংগঠক বঁটা আগবঢ়াব ছাত্ৰ সংগঠনটোৱে৷
সংগঠনটোৰ গোলাঘাট জিলা সমিতিৰ সভাপতি মন্টু চাহু আৰু সম্পাদক বিজয় কানুৱে জানিব দিয়া ম’তে, অনুষ্ঠানত সংগঠনটোৰ কেন্দ্ৰীয় সমিতিৰ সভাপতি আলোক যাদৱ, সম্পাদক অজয় প্ৰসাদ উপস্থিত থাকিব৷ অনুষ্ঠানত কেবিনেট মন্ত্ৰী তথা বোকাখাতৰ বিধায়ক অতুল বৰা, অসম ক্ৰীড়া ব’ৰ্ডৰ উপাধ্যক্ষ আকাশ ফুকন, বোকাখাতৰ পৌৰপতি পৱন বৰুৱা, বোকাখাত অগপৰ সভাপতি জগত কলিতা আৰু বোকাখাত অগপৰ চাহ কোষৰ সভাপতি সোণালাল সোণাৰ উপস্থিত থাকিব৷
