গৃহহীন দেশৰ প্ৰধান মন্ত্ৰী
নগদ ধন মাত্ৰ ৫২,৯২০ টকা
বুবুল দত্ত, বোকাখাতঃ
ৰাজনীতিৰ পথাৰত ভৰি দিলেই নাৰী-বাড়ী-গাড়ী গোটোৱাটো যেন একপ্ৰকাৰ ফেশ্বনত পৰিণত হৈছে৷ বহু ৰাজনৈতিক নেতা আকৌ মাটি-সম্পত্তি গোটোৱাৰ সমান্তৰালভাৱে দ’মে দ’মে টকাও গোটায়৷ বিপৰীতে গৃহহীন আমাৰ দেশৰ প্ৰধানমন্ত্ৰী।
বিশ্বৰ ৰাজনীতিত সবল শক্তিশালী ৰাজনৈতিক নেতৃত্বৰ আগশাৰীত থকা ভাৰতৰ প্ৰধানমন্ত্ৰী নৰেন্দ্ৰ মোদীৰ থাকিবলৈ এটা ঘৰ নাই। বিশ্বৰ বৃহৎ জনসংখ্যাৰ দেশ ভাৰতৰ প্ৰধানমন্ত্ৰী গৰাকী গৃহহীন। এতিয়ালৈকে তেখেতৰ নামত নাই এখনো গাড়ী। টকা পইচাৰ ফালৰ পৰাও সবল নহয় আমাৰ প্ৰধানমন্ত্ৰী গৰাকী। নগদ ধন আছে মাত্ৰ ৫২,৯২০ টকা।
মঙলবাৰে অন্তিম পৰ্যায়ৰ সংসদীয় নিৰ্বাচনৰ বাবে মনোনয়ন দাখিল কৰিছে প্ৰধানমন্ত্ৰী গৰাকীয়ে।বাৰানসী সমষ্টিৰ বিজেপি প্ৰাৰ্থী হিচাপে মনোনয়ন দাখিল কৰা বৰ্তমানৰ প্ৰধানমন্ত্ৰী নৰেন্দ্ৰ মোদীয়ে মনোনয়নৰ সৈতে গাঁথি দিয়া শপতনামাত উল্লেখ কৰিছে এই তথ্য। প্ৰসিদ্ধ বেদ বিশাৰদ গণেশ্বৰ শাস্ত্ৰীয়ে নিৰ্ধাৰণ কৰি দিয়া শুভক্ষণত মঙ্গলবাৰে মনোনয়ন দাখিল কৰিছে প্ৰধানমন্ত্ৰী নৰেন্দ্ৰ মোদীয়ে।
অৱশ্যে ঘৰ-মাটি-গাড়ী নেথাকিলেও সাংসদ প্ৰাৰ্থী নৰেন্দ্ৰ মোদীৰ আছে ৩.০২ কোটি টকাৰ অস্থাৱৰ সম্পত্তি। আনহাতে, শপতনামাত উল্লেখ কৰা মতে, মোদীৰ ২০২২-২৩ বৰ্ষত কৰ যুক্ত উপাৰ্জনৰ পৰিমাণ ২৩ দশমিক ৫ লাখ টকা হৈছেগৈ। ষ্টেট বেংক অৱ ইণ্ডিয়াৰ গান্ধী নগৰ শাখাত থকা তেখেতৰ একাউন্টত ৭৩,৩০৪ টকা, এচ বি আইৰ বাৰানসী শাখাত মাত্ৰ ৭ হাজাৰ টকাহে জমা আছে। ষ্টেট বেঙ্ক অৱ ইণ্ডিয়াত প্ৰধানমন্ত্ৰী গৰাকীক স্থায়ী জমা ধনৰ পৰিমান ২,৮৫,৬০,৩৩৮ টকা থকাৰ কথা শপতনামাত উল্লেখ আছে। উল্লেখ থকা মতে ২,৬৭,৭৫০ টকা মূল্যৰ ৪ টা সোণৰ আঙুঠিও আছে মোদীৰ৷ দুবাৰকৈ বাৰানসী সমষ্টিৰ পৰা প্ৰতিনিধিত্ব কৰা প্ৰধানমন্ত্ৰী নৰেন্দ্ৰ মোদীৰ আয়, উপাৰ্জন আৰু সম্পত্তিৰ দিশ চকুত লগা ধৰণৰ।
মঙলবাৰে মনোনয়ন দাখিলৰ সময়ত দেশৰ বিজেপি শাসিত ৰাজ্য সমূহৰ মুখ্যমন্ত্ৰী সকলে মোদীক সংগ দিছিল।অসমৰ পৰা এন ডি এ মৰ্চাৰ সহযোগী দল অসম গণ পৰিষদৰ সভাপতি তথা অসম চৰকাৰৰ জ্যেষ্ঠ মন্ত্ৰী অতুল বৰাই সংগ দিছিল মোদীক।
