২ নং কহঁৰা প্ৰাথমিক বিদ্যালয়ৰ প্ৰাক্তন ছাত্ৰ- ছাত্ৰীক সম্বৰ্দ্ধনা
ৰাইজৰ খবৰ ডিজিটেল, কাজিৰঙাঃ কাজিৰঙা ৰাষ্ট্ৰীয় উদ্যানৰ দাঁতিকাষৰীয়া ২ নং কহঁৰা প্ৰাথমিক বিদ্যালয়ৰ একাংশ প্ৰাক্তন কৃতী ছাত্ৰ- ছাত্ৰীক বিদ্যালয় কৰ্তৃপক্ষৰ তৰফৰ পৰা সম্বৰ্দ্ধনা জ্ঞাপন কৰা হয়৷ আজি বিদ্যালয়খনত আয়োজিত গ্ৰীষ্ম বন্ধ ঘোষণা অনুষ্ঠানৰ লগত সংগতি ৰাখি বিদ্যালয়খনৰ ৮ গৰাকী প্ৰাক্তন ছাত্ৰ-ছাত্ৰীক তেওঁলোকে শিক্ষাৰ ক্ষেত্ৰত দেখুওৱা পাৰদৰ্শিতাৰ চিন হিচাপে জ্ঞাপন কৰা হয় এই সম্বৰ্দ্ধনা৷ বিদ্যালয়খনৰ সহকাৰী শিক্ষক অমৃত দত্তই আঁত ধৰা অনুষ্ঠানত উদ্দেশ্য ব্যাখ্যা কৰে প্ৰধান শিক্ষক যোগেশ কোঁচে৷
অঞ্চলটিৰ জ্যেষ্ঠ ব্যক্তি দান চাওঁৰাই সভাপতিত্ব কৰা অনুষ্ঠানটিত বিদ্যালয় পৰিচালনা সমিতিৰ বিষয়-ববীয়া, অভিভাৱকসকলৰ লগতে ছাত্ৰ-ছাত্ৰী আৰু স্থানীয় লোক উপস্থিত থাকে৷ অনুষ্ঠানত সদ্য ঘোষিত স্নাতক ডিগ্ৰীৰ চূড়ান্ত পৰীক্ষাত সুখ্যাতিৰে উত্তীৰ্ণ হোৱা অঞ্চলটোৰ নিৰ্জলা গণক, বন্দিতা বৰা আৰু ৰুমীতা চাওঁৰাক সম্বৰ্দ্ধনা জনোৱা হয়৷ তিনিও গৰাকী প্ৰাক্তন ছাত্ৰীয়ে প্ৰথম বিভাগত উত্তীৰ্ণ হৈ অঞ্চলটোলৈ গৌৰৱ কঢ়িয়াই আনিছে৷
উল্লেখ্য, নিৰ্জলা গণকে ৮২ শতাংশ নম্বৰসহ ডিব্ৰুগড় বিশ্ববিদ্যালয়ৰ ভিতৰতে ১৭ সংখ্যক স্থান পাবলৈ সক্ষম হৈছে৷
ইফালে, অনুষ্ঠানতে সদ্য ঘোষিত হাইস্কুল শিক্ষান্ত পৰীক্ষাত উত্তীৰ্ণ নীতা ছেত্ৰী, জুলী গণক, বিকাশ চাওঁৰা, জুতিকা গণক আৰু ববিতা কুৰ্মীক সম্বৰ্দ্ধনা জনোৱা হয়৷ সভাত পৰিচালনা সমিতিৰ হৈ ছাত্ৰ-ছাত্ৰীসকলক উৎসাহিত মন্তব্যৰে চুকুৰমণি কুৰ্মী আৰু স্বপ্না শইকীয়া চাওঁৰাই বক্তব্য ৰাখে৷
