ৰাইজৰ খবৰ ডিজিটেল, কাজিৰঙাঃ ‘চৰণেহে জানে মৰণৰ ঠাই’— কাজিৰঙা ফুৰিবলৈ অকাল মৃত্যুক সাৱটিলে এগৰাকী পৰ্যটকে৷ ফুৰিবলৈ আহিছিল ঠিকেই, কিন্তু, দিল্লী নিবাসী আলোক গাৰ্গ নামৰ লোকজনৰ মৃত্যু যেন ৰৈ আছিল কাজিৰঙাত৷ ইতিমধ্যে ৰাষ্ট্ৰীয় উদ্যান ভ্ৰমণ কৰি আজি উভতি যোৱাৰ প্ৰাকক্ষণত অকাল মৃত্যুক সাৱটে আলোক গাৰ্গ নামৰ পৰ্যটকগৰাকীয়ে৷ তথ্য অনুসৰি, কাজিৰঙাৰ ধনশিৰি নামৰ ব্যক্তিগত অতিথিশালাত কালিৰে পৰা পত্নীৰ স’তে বাহৰ পাতি আছিল ৬৪ বছৰ বয়সীয়া আলোক গাৰ্গ নামৰ পৰ্যটক গৰাকী৷ কালি দম্পতীহালে কাজিৰঙা ৰাষ্ট্ৰীয় উদ্যানত জীপ ছাফাৰীও কৰিছিল। আজি দিনৰ ভাগত কাজিৰঙা এৰাৰ কথা আছিল যদিও পুৱা প্ৰায় ৬-৩০ বজাত হঠাৎ উক্ত পৰ্যটন নিবাসৰ কোঠাত ৬৪ বছৰীয়া পৰ্যটকজন অসুস্থ হৈ পৰে। ততাতৈয়াকৈ তেওঁৰ পত্নীয়ে চিকিৎসাৰ বাবে পৰ্যটন নিবাসৰ কৰ্মীৰ সহযোগত কহঁৰাস্থিত ছহীদ বেজা বৈষ্ণৱ আদৰ্শ চিকিৎসালয়লৈ নিছিল যদিও চিকিৎসকে মৃত বুলি ঘোষণা কৰে। ধনশিৰি পৰ্যটন নিবাসৰ প্ৰৱন্ধক দুলাল গগৈয়ে জানিবলৈ দিয়া মতে, পৰ্যটকদ্বয়ে কাজিৰঙা ৰাষ্ট্ৰীয় উদ্যান দৰ্শন কৰি আজি কাজিৰঙাৰ পৰা উভতি যোৱাৰ কথা আছিল। কিন্তু, তাৰ পূৰ্বেই অকাল মৃত্যুক সাৱটে৷ ইপিনে, কহঁৰাস্থিত ছহীদ বেজা বৈষ্ণৱ আদৰ্শ চিকিৎসালয়ৰ চিকিৎসক ঈশান শইকীয়াই জনোৱা অনুসৰি, চিকিৎসলয়লৈ অনাৰ পূৰ্বেই পৰ্যটকজনৰ মৃত্যু হৈছিল। পৰ্যটকজন পূৰ্বৰ পৰাই হৃদ ৰোগত আক্ৰান্ত হৈ আছিল। ইফালে, কহঁৰা আৰক্ষীয়ে গোলাঘাটত মৰণোত্তৰ পৰীক্ষা কৰাই মৃতদেহ পৰিয়ালৰ লোকক গতাই দিয়াৰ পিছত পৰ্যটকজনৰ মৃতদেহ দিল্লীলৈ নিয়াৰ ব্যৱস্থা কৰিছে বুলি জানিব পৰা গৈছে।
