সমাজকৰ্মী পৰমেশ্বৰ পানিকাক সভাপতি, সাংবাদিক বিতোপন মাজিক সম্পাদক হিচাপে লৈ ৩১ জনীয়া সমিতি গঠন
নিউজ ডেস্ক ৰিপ’ৰ্ট, ৰাইজৰ খবৰ ডিজিটেলঃ চাহ জনগোষ্ঠীয় লোকসকলৰ সাহিত্য, শিক্ষা, সাংস্কৃতিক উত্তৰণৰ পৰিকল্পনাৰে কাম কৰি অহা অসম চাহ জনগোষ্ঠী সাহিত্য সভাই গঠন কৰে কাজিৰঙা শাখা৷ সমাজকৰ্মী পৰমেশ্বৰ পানিকাক সভাপতি আৰু সাংবাদিক বিতোপন মাজিক সম্পাদক হিচাপে লৈ ৩১ জনীয়া পূৰ্ণাংগ কাজিৰঙা শাখা সমিতি গঠন কৰা হয়৷
চাহ জনগোষ্ঠী সাহিত্য সভাৰ কেন্দ্ৰীয় সমিতিৰ সহকাৰী সম্পাদক পংকজ কালিন্দী, কোষাধ্যক্ষ হৰিবোলা কালিন্দী আৰু আটছা কেন্দ্ৰীয় সমিতিৰ মুখ্য সাংগঠনিক সম্পাদক অনিত গড়ৰ উপস্থিতিত কালি সন্ধ্যা কাজিৰঙাৰ হাতীখুলি চাহ বাগিছাৰ মজদুৰ সংঘৰ ক্লাৱ প্ৰাংগণত অনুষ্ঠিত এক গাম্ভীৰ্যপূৰ্ণ সভাত এই কাজিৰঙা শাখাটি গঠন কৰা হয়৷
সাহিত্য সভাৰ গোলাঘাট জিলা সমিতিৰ সভাপতি প্ৰতাপ কুমাৰ দল আৰু সম্পাদক সোণেশ্বৰ বাঢ়ৈৰ তত্বাৱধানত তথা পৰ্যবেক্ষণত অনুষ্ঠিত এই সভাত দিৰিং বাগিছা সংঘৰ সভাপতি দশৰথ মুণ্ডাই সভাপতিত্ব কৰে৷
সভাতে সাহিত্য সভাৰ শিক্ষা সমিতিৰ জ্যেষ্ঠ সদস্য তথা অৱসৰপ্ৰাপ্ত শিক্ষক দয়াৰাম মাজি আৰু অৱসৰপ্ৰাপ্ত শিক্ষক তথা সাহিত্য সভাৰ বোকাখাত শাখাৰ সম্পাদক ভৰত ৰবিদাসক সংবাদ পত্ৰ জননী বাৰ্তা আৰু অসম চাহ জনগোষ্ঠী সাহিত্য সভাৰ গোলাঘাট জিলাৰ তৰফৰ পৰা শিক্ষক দিৱসৰ উপলক্ষে আগবঢ়োৱা গুৰু প্ৰণাম সম্বৰ্ধনা জ্ঞাপন কৰা হয়৷
সভাত বোকাখাত শাখাৰ সভাপতি ৰাজু ৰাজোৱাৰ, অনাতাঁৰ শিল্পী নুনুসিং কৰ্মকাৰ, হাতীখুলি বাগিছা সংঘৰ সম্পাদক কিষাণ কৰ্মকাৰকে আদি কৰি অৰ্ধশতাধিক লোক উপস্থিত থাকে৷
